.webp){kind=icon}
Делегатите на Организацијата на земји извознички на нафта и нивните сојузници (ОПЕК+) рекоа дека очекуваат советодавниот комитет на министри да препорача да се задржи нивото на производство на нафта непроменето кога ќе се состанат следната недела во услови на закрепнување на глобалната побарувачка.
Саудиска Арабија и нејзините партнери ќе одржат преглед на нивоата на производство на 1 февруари, откако договорија значителни намалувања кон крајот на минатата година за да ги одржат светските пазари на сурова нафта во рамнотежа. Делегатите од групата изјавија дека очекуваат панелот на министри да го задржи статус квото, бидејќи чекаат јасност за закрепнувањето на потрошувачката во Кина и расплет од влијанието на санкциите врз руското снабдување.
Меѓународните цени на нафтата се искачија во изминатите две недели, приближувајќи се до 90 долари за барел, бидејќи Кина, која е најголем увозник на нафта во светот, се откажува од речиси тригодишните строги ограничувања против ковид. Сепак, патот на закрепнување останува неизвесен, бидејќи земјата се соочува со оживување на вирусот, што ги натера членките на ОПЕК+ да останат конзервативни.
Во исто време, ОПЕК + чека да го види целосното влијание на санкциите од Европската Унија врз нивната земја-членка Русија поради нејзината инвазија врз Украина. Мерките насочени кон продажбата на сурова нафта стапија во сила во декември, а ограничувањата за трговијата со рафинирани производи ќе пристигнат следниот месец, но досега руските пратки беа изненадувачки отпорни.
„Се чини дека ОПЕК + сè поверојатно ќе ги задржи нивоата на производство непроменети дури и по закажаниот состанок. Цените се зацврстија, понудата останува слаба, а значителни нивоа на несигурност преовладуваат и за понудата и за побарувачката“, рече Раад Алкадири, аналитичар во консултантската групација „Еуразија“ (Eurasia Group).
Одлуката снабдувањето да остане стабилно од страна на Заедничкиот министерски комитет за следење кога ќе се состане онлајн следната недела ќе биде во согласност со сигналите од највисоките функционери во Организацијата на земји извознички на нафта. Генералниот секретар на ОПЕК, Хајтам ал-Гаис, месецов изјави дека е внимателен оптимист за глобалната економија, бидејќи новото закрепнување во Кина е ублажено од слабоста во напредните економии. Саудискиот министер за енергија, принцот Абдулазиз бин Салман, минатиот месец инсистираше на тоа дека ОПЕК+ ќе биде проактивен и превентивен за да ги одржува пазарите во рамнотежа.
„Сите знаци укажуваат дека Саудиска Арабија засега се обидува да се придржува до политиката на превентива и да ги задржи ограничувањата во производството додека не се појават јасни индикации дека има доволна побарувачка за дополнителна понуда“, рече Хелима Крофт, раководител за стратегии за стоки во „РБЦ Капитал“ (RBC Capital).
„Маркетс“ (Markets LCC), „Голдман Сакс“ (Goldman Sachs Group Inc) и „Енерџи аспектс“ (Energy Aspects Ltd) предвидуваат дека ОПЕК+ допрва ќе почне да ги менува ограничувањата на понудата и ќе го зголеми производството во втората половина од годината, кога забрзаната побарувачка ќе го затегне пазарот. Алијансата од 23 земји-членки треба да се состане во седиштето на ОПЕК во Виена, на почетокот на јуни, за да ги разгледа нивоата на производство за остатокот од 2023 година.
