Цените на европскиот природен гас се движат кон неделна загуба, бидејќи поблагите временски прогнози се спротивставија на помалите испораки од Норвешка.
Референтните фјучерси денеска се движат помеѓу мали добивки и загуби, откако норвешкиот управител на мрежата објави непланирани прекини во погонот за преработка. Претходно во текот на денот, фјучерсите загубија дури 4,9 проценти од вредноста, откако вчера беше затворен на најниско ниво во повеќе од 16 месеци.
Цените сè уште притискаат кон својата најголема неделна загуба од декември, при што потоплите температури следната недела веројатно ќе ги олеснат побарувачката и притисокот врз резервите од гас. Покрај тоа, се зголемуваат изгледите дека долго затворениот извозен терминал во САД би можел да продолжи со испораките подоцна во текот на овој квартал. „Фрипорт“ (Freeport LNG), кој неодамна ги заврши поправките по експлозијата минатото лето, доби одобрение од регулаторите за некои операции. Многу аналитичари очекуваат дека фабриката, која претходно сочинуваше околу 15 отсто од американските пратки на течен природен гас, би можела да го рестартира извозот околу март.
Доста топлото време оваа зима и напорите за заштеда на енергија помагаат да се олесни историската енергетска криза во Европа по бурниот период минатата година. Намалената побарувачка и големиот проток на течен природен гас ги задржаа резервите на овој енергент во регионот далеку над сезонските просеци, а цените на горивата паднаа во однос на минатогодишните врвови, при што инфлацијата почна да се намалува, како и стравувањата од рецесија.
Ниво на резерви од гас во европските складишта / Bloomberg Mercury
„Европа нема да остане без гас наскоро. Европа моментално е на пат да набави повеќе од доволно гас за целосно да ги дополни своите резерви до крајот на септември и покрај несигурностите што претстојат“, велат аналитичарите на „Блумберг НЕФ“ (BloombergNEF), Стефан Улрих и Арун Тора.
Холандскиот гас, кој претставува репер во Европа, денеска се тргуваше за два процента повисоко, односно по цена од 55,9 евра за мегават-час, но сепак се упатува кон неделен пад од околу 16 отсто. Еквивалентниот договор во Обединетото Кралство порасна за 1,1 отсто.
По неодамнешниот пад на цената, трговците внимаваат на какви било знаци за промена на протокот на течен природен гас додека Европа се натпреварува со Азија за виталното гориво. Пониските трошоци за енергија, исто така, создаваат потенцијал за враќање на потрошувачката.
.webp){kind=icon}
