.webp){kind=icon}
Висок функционер на Организацијата на земји извознички на нафта (ОПЕК) ги повика земјите да инвестираат многу повеќе во нафта за да ги задоволат идните енергетски потреби на светот и рече дека климатските политики треба да бидат поурамнотежени и праведни.
„Императив е сите страни вклучени во тековните преговори за климата да застанат за момент и да ја погледнат големата слика. Тие мора да работат кон енергетска транзиција што е уредна, инклузивна и помага да се обезбеди енергетска безбедност за сите“, рече денеска Хајтам ал-Гаис, генерален секретар на ОПЕК, на енергетската конференција во Каиро.
Неговите коментари доаѓаат во време на промена меѓу некои западни влади и компании во врска со фосилните горива. Цените на нафтата, природниот гас и јагленот се зголемија по руската инвазија на Украина во февруари минатата година, туркајќи ја енергетската безбедност на врвот на агендата за многу лидери.
Американскиот претседател Џо Бајден за време на својот говор за состојбата на Унијата минатата недела рече дека ќе ни треба нафта најмалку уште една деценија. Во Европа, „Шел“ (Shell Plc) сигнализира дека ќе престане да ги забрзува трошоците за обновлива енергија, додека БП (BP Plc) го забави планираното намалување на производството на нафта и гас.
Ал-Гаис од ОПЕК рече дека нафтената индустрија е погодена од неколкугодишното хронично недоволно инвестирање. Според него, потребни се 500 милијарди долари инвестиции годишно до 2045 година.
„Домаќинот на климатскиот самит КОП28 од Обединетите Арапски Емирати (ОАЕ) кон крајот на 2023 година ќе послужи како нова можност за истражување инклузивни, одржливи и консензуални решенија за климатските промени“, рече генералниот секретар, член на ОПЕК, кој е од Кувајт.
ОАЕ, кои се исто така дел од ОПЕК, го назначија Султан ал-Џабер, шеф на националната компанија за нафта и гас „Аднок“ (Adnoc), за претседател на самитот. Иако тоа предизвика контроверзии, Ал-Џабер рече дека производителите на јаглеводороди мора да бидат во првите редови на климатските преговори ако светот сака да премине кон почиста енергија, а истовремено да се осигури дека цените на горивото остануваат достапни.
Ал-Гаис повтори дека ОПЕК и неговите партнери, познати како ОПЕК +, алијансата од 23 нации, која е предводена од Саудиска Арабија и Русија, се посветени на одржување стабилен нафтен пазар.
Саудиска Арабија и другите основни членки на ОПЕК веројатно нема да одговорат на соопштението на Русија во петокот за намалување на производството, објави „Блумберг“.
Додека Москва на крајот на минатата година навести дека може да го намали производството како одмазда против западните санкции, цените на суровата нафта сепак скокнаа во петокот. Нафтата брент поскапе за 8,1 отсто минатата недела, искачувајќи се на 86,90 долари за барел.
