.webp){kind=icon}
Европската комисија ќе предложи продолжување на вонредните мерки за намалување на потрошувачката на гас до следната година за земјите од ЕУ да можат подобро да се подготват за претстојната зима, изјави комесарката за енергетика Кадри Симсон.
„Сегашната доброволна цел за намалување на потрошувачката за 15 отсто истекува на крајот на март, а нејзиното продолжување е неопходно за да се обезбедат доволни количества гас за следната грејна сезона“, изјави Симсон пред пратениците во Европскиот парламент.
Зимава ЕУ успеа да ја намали потрошувачката речиси за 20 проценти.
„Ваквиот пристап е најдобрата гаранција за повторно постигнување високи нивоа на резерви до ноември. Оваа година ќе биде предизвик, како и годината претходно. Постои високо ниво на неизвесност“, посочи Симсон.
Кадри Симсон
Bloomberg Mercury
ЕУ сака да ги дополни своите магацини до 90 отсто пред следната зима. Поради топлата зима резервите не се потрошија премногу, па во моментов се на ниво од нешто помалку од 60 отсто.
Сепак, ЕУ и Меѓународната агенција за енергетика посочуваат дека може да има проблеми со снабдувањето со течен природен гас (LNG) во случај кинеската побарувачка силно да порасне.
Во април ЕУ планира за првпат да објави тендер за заедничка набавка на гас. Оваа практика би продолжила и понатаму.
Прочитајте повеќe: ЕУ во април започнува заедничка набавка на гас
Бидејќи рускиот природен гас повеќе не е клучен фактор за полнење на европските резерви, пазарот внимателно ќе следи како се развива ситуацијата во овој контекст во текот на летото.
Сепак, иако рускиот гас не доаѓа преку цевководи како порано, увозот на руски ЛНГ е во пораст.
Симсон повика да се прекинат и тие испораки.
„Европските компании не треба да ги обновуваат долгорочните договори со Русија кога ќе истечат сегашните“, нагласи таа.
Минатата година ЕУ купи околу 20 милијарди кубни метри ЛНГ од Русија.
„Можеме и треба целосно да се откажеме од рускиот ЛНГ што е можно поскоро, но имајќи ја предвид сигурноста на снабдувањето. Одбивањето да се обноват договорите со Русија е најдобриот начин да им покажеме на нашите партнери дека можат да имаат долгорочна доверба во нашата побарувачка“, оцени Симсон.
