Следниот месец Европската Унија (ЕУ) планира да ги преземе првите заеднички чекори за купување гас, што би требало да помогне во намалувањето на цените на енергијата.
„Првичните процени покажуваат дека заедничката побарувачка изнесува 24 милијарди кубни метри гас во следните три години“, изјави потпретседателот на Европската комисија, Марош Шефчовиќ. Тендерот ќе биде објавен во април, а ЕУ очекува да ги потпише првите заеднички договори со доставувачи од САД, Блискиот Исток и Африка во јуни.
Заедничката набавка на гас е нова алатка на ЕУ, која има цел да го ограничи растот на трошоците за енергија. Иако цената на гасот е значително намалена во споредба со август минатата година, трошоците за енергија сè уште ја поттикнуваат инфлацијата и влијаат на конкурентноста на компаниите од ЕУ во споредба со оние од САД и Кина.
„Дефинитивно мораме да ги свртиме економските трендови во Европа. Верувам дека создаваме нов систем што ќе ја зголеми конкурентноста, ќе донесе нови доставувачи и ќе ги намали цените. Откако започнавме со овој модел, видовме голем интерес од меѓународните доставувачи“, рече Шефчовиќ.
Тој додаде дека интерес за заеднички откуп на гас има кај индустриските потрошувачи во повеќе сектори, како што се производството на челик, алуминиум, керамика, стакло и автомобилската индустрија.
Меѓутоа, сегашната заедничка побарувачка е само дел од количеството гас што земјите од ЕУ го увезоа во 2021 година во износ од 338 милијарди кубни метри. Во меѓувреме, заедничката набавка стана задолжителна за најмалку 15 отсто од количествата потребни за полнење на магацините. Според Шефчовиќ, повеќе од 50 доставувачи од целиот свет се подготвени да влезат во бизнис со ЕУ.
Kyos European Gas Analytics
По првиот тендер во април, ЕУ редовно ќе организира вакви набавки за да обезбеди доволни количества гас.
„Јас сум против самозадоволството или чувството дека тешките времиња се зад нас, бидејќи не знаеме што нè чека годинава. Исклучително е важно да се позанимаваме со цените. Не можеме да ја одржиме нашата економија со толку голема разлика во цената (гас) во споредба со САД или Кина“, истакна Шефчовиќ.
.webp){kind=icon}