Цената на нафтата падна во пресрет на одлуката за каматните стапки на Федералните резерви (ФЕД), откако претходно забележа дводневен раст, кој беше поттикнат од намалувањето на загриженоста поради банкарските кризи во САД и во Европа.
Имено, ВТИ за испорака во мај загуби 0,6 проценти од вредноста, паѓајќи на 69,25 долари за барел, додека нафтата брент падна 0,5 отсто, со што сега барел се тргува по цена од 74,91 долар.
Фјучерсите на ВТИ се тргуваа близу 69 долари за барел, откако пораснаа речиси за четири проценти во текот на претходните две сесии на тргување, додека американските власти ги проучуваат начините на кои може привремено да ја зголемат заштитата за сите депозити.
Пазарите проценуваат приближно 80 отсто шанси дека ФЕД на денешниот состанок ќе одлучи да ги зголеми стапките за четвртина поен.
Движење на цената на ВТИ и нафтата брент / Bloomberg Mercury
Банкарските превирања минатата недела ја доведоа нафтата на најниско ниво во последните 15 месеци и ја зголемија нестабилноста на светските пазари. Голем број аналитичари на овој пазар и натаму остануваат оптимисти за изгледите, делумно поради враќањето на Кина по ограничувањата против ковид, при што предвидувањата за цените во втората половина годинава се движат помеѓу 80 и 140 долари за барел.
„Русија одлучи да го задржи своето производство на намалено ниво до јуни, имајќи ја предвид моменталната ситуација“, рече вицепремиерот Александар Новак. Земјата вети дека овој месец ќе го намали производството за 500.000 барели дневно.
.webp){kind=icon}
