.webp){kind=icon}
Нафтата се упати кон шести по ред месечен пад, што претставува нејзини најдолг период на такви загуби во повеќе од осум години. Причина е главно загриженоста за забавувањето на економиите во САД и Азија, што влијаеше на изгледите. Инвеститорите гледаат дека инфлацијата во САД продолжува да се забрзува, зајакнувајќи ги очекувањата дека Федералните резерви (ФЕД) ќе бидат принудени да продолжат да ги зголемуваат стапките, што ќе ја направи поверојатна рецесијата, а тоа ќе ја намали потрошувачката на енергија.
Месечна промена на цената на ВТИ / Bloomberg Mercury
Нафтата ВТИ за испорака во јуни утрово порасна за 0,7 проценти, на 75,26 долари за барел, додека вредноста на нафтата брент се покачи за 0,8 отсто, на 79,02 долари. И покрај денешниот раст, ВТИ е на пат да оствари втора неделна загуба.
Падот на профитните маржи за рафинериите во Азија сигнализира слабост на побарувачката во најголемиот увозник на нафта, иако закрепнувањето на Кина почнува да станува видливо.
Суровата нафта првично месецов драстично порасна откако Организацијата на земји извознички на нафта и нејзините сојузници (ОПЕК+) објави дека го намалува производството, но потоа растот беше анулиран, бидејќи изгледите се влошија. Снабдувањето од Русија остана изненадувачки отпорно и покрај санкциите и ограничувањето на цената, а враќањето на Кина беше побавно отколку што некои очекуваа.
Трговците ги очекуваат резултатите од заработката во првиот квартал на големите нафтени компании, вклучувајќи го и „Ексон“ (Exxon Mobil Corp).
