Цената на нафтата опаѓа трета сесија по ред, додека инвеститорите ги следат преговорите во САД за постигнување договор за максималната граница на долгот.
Нафтата ВТИ за испорака во јуни падна за 0,8 проценти, точно на 71 долар за барел, додека договорите за испорака во јули се со еден отсто помала вредност. Цената на нафтата брент, пак, која е за испорака во јули, падна за еден отсто, на 74,85 долари за барел.
Суровата нафта од типот брент падна под 75 долари за барел, откако загуби речиси два отсто во претходните две сесии. Претседателот Џо Бајден и претседателот на Претставничкиот дом, Кевин Мекарти, ќе се сретнат во текот на денешниот ден, откако преговарачите сепак ги продолжија разговорите. Министерката за финансии Џенет Јелен предупреди дека од средината на јуни САД можеби нема да можат да ги плаќаат своите обврски.
Глобалната референтна вредност за суровата нафта е изложена на ризик да забележи петта последователна месечна загуба во мај, што би било најлоша низа од 2017 година. Покрај последиците од борбата за лимитот на американскиот долг, трговците се загрижени за влијанието врз побарувачката на енергија од слабото кинеско економско закрепнување и можноста за рецесија во САД.
„И покрај надежите за продолжување на разговорите, постојат ризици дека договорот ќе биде одложен до последен момент“, рече Чару Чанана, пазарен стратег во „Саксо“ (Saxo Capital Markets Pte). „Дури и ако се постигне договор, тоа може да биде проследено со одлив на ликвидност, бидејќи Министерството за финансии издава обврзници и тоа може да им наштети на ризичните средства“, рече таа.
Цената на суровата нафта утрово падна заедно со другите суровини, при што металите, вклучувајќи ги и бакарот и железната руда, се тргуваа пониско. Индексот на стоки на „Блумберг“ изгуби околу девет проценти оваа година и минатата недела го забележа своето најниско затворање од крајот на 2021 година.
Во меѓувреме, ситуацијата со шумските пожари во Канада, во провинцијата Алберта, која најмногу произведува енергија, остана нестабилна во текот на викендот, со прекин на производството на нафта и гас, што значи дека купувачите се соочуваат со намалено снабдување.
.webp){kind=icon}
