.webp){kind=icon}
Цената на нафтата се намали бидејќи трговците ги одмеруваат изгледите за понудата и побарувачката на пазарот по изненадувачкото ветување на Саудиска Арабија за дополнително кратење на испораките.
ВТИ за испорака во јули утрово падна за 0,4 проценти, на 71,84 долар за барел, а цената на нафтата брент за испорака во август се намали за 0,3 отсто, на 76,46 долари.
Движење на цената на ВТИ и нафтата брент / Bloomberg Mercury
Фјучерсите за нафта вчера рано утрото се зголемија, откако Саудиска Арабија по викенд-средбата на Организацијата на земји извознички на нафта и нивните сојузници (ОПЕК+) објави дека ќе ја намали понудата. Кралството исто така ги зголеми цените на суровата нафта за испорака во јули во Азија. Саудиска Арабија вети дека ќе стори сè што е потребно за да го стабилизира пазарот, бидејќи загриженоста за изгледите за побарувачката, особено од Кина, влијаеше на цените.
Нафтата минатиот месец падна за 11 проценти, делумно поради еластичното руско производство, и покрај тоа што производителот од ОПЕК+ претходно оваа година изјави дека ќе ја намали понудата. Кралството одлучи да го намали производството во јули за еден милион барели дневно и да ја зголеми цената на суровата нафта за истиот месец.
Според истражувањето на купувачите во Азија, кое беше спроведено пред состанокот на ОПЕК+, се очекуваше Саудиска Арабија да ја намали цената на својата нафта.
„На состанокот на ОПЕК+ беше повторена посветеноста да се обезбеди стабилност, но исходот од состанокот ќе има минимално влијание врз нафтениот пазар“, рече Шон Лим, аналитичар за РХБ (RHB Investment Bank Bhd) во Куала Лумпур.
