Цената на нафтата расте, Иран повика на ембарго за Израел

Иран повика на воведување ембарго на нафтата против Израел поради неговите воздушни напади врз Газа, што доведе до пораст на цената на нафтата.

Иранскиот министер за надворешни работи Хосеин Амирабдолахиан рече дека треба да има „итно и целосно ембарго на ционистичкиот режим од страна на исламските земји, ембарго на нафтата против тој режим“, како што е наведено во соопштението на Министерството објавено на Телеграм. Тој исто така ги повика муслиманските земји да ги протераат израелските амбасадори.

Нафтата брент продолжи да расте и поскапе за цели 3,5 отсто по коментарите од Иран. Брент моментално се тргува за нешто повеќе од 92 долара за барел.

Трговците со нафта сè повеќе се загрижени дека израелската војна против Хамас ќе се прошири и потенцијално ќе ги вовлече Иран - главен извозник на нафта - и неговите сојузници како Хезболах во Либан. Меѓутоа, Израел е мал увозник. И додека другите производители на енергија од Блискиот Исток, вклучувајќи ги и Саудиска Арабија и Обединетите Арапски Емирати, го критикуваа Израел за неговите напади врз Газа, тие не разговараа за запирање на продажбата на Израел или на некој од неговите сојузници.

Амирабдолахиан ова го изјави во Саудиска Арабија, на самитот на Организацијата за исламска соработка, свикан за да се разговара за војната меѓу Израел и Хамас.

Коментарите дојдоа во моменти кога американскиот претседател Џо Бајден пристигна во Тел Авив во обид да ги смири регионалните тензии и да го поддржи Израел.

Иран го осуди Израел за блокадата на Газа и смртта на цивили. Исламската Република е најголемиот непријател на Израел и го поддржува Хамас. Техеран, сепак, негираше вмешаност во нападите на оваа група врз Израел на 7 октомври, во кои загинаа повеќе од 1.400 луѓе.

Повеќе од 3.000 Палестинци се убиени откако Израел започна одмазднички напади врз Газа.

САД и ЕУ го прогласија Хамас за терористичка организација.

Во моментов нема коментари за веста. Биди прв да коментира...

Остави коментар