ЕУ размислува да ја продолжи мерката за ограничување на цената на гасот

Европа размислува дали да ја продолжи итната мерка за ограничување на цените на гасот што беше воведена претходно годинава, бидејќи стравува дека зимава цените би можеле да пораснат поради конфликтот на Блискиот Исток и саботажа на гасоводи, пишува „Фајненшл Тајмс“, повикувајќи се на презентација која била претставена пред дипломатите.

Од воведувањето на ограничувањето не се забележани „негативни ефекти“, а цените на гасот се речиси 90 отсто пониски од минатата година, се наведува во документот.

Високи дипломати и официјални претставници на Европската унија за лондонскиот весник изјавиле дека падот на цените на енергијата и рекордните нивоа на резерви можеби не се доволни за да се отфрли загриженоста за влијанието на конфликтот или потенцијалните саботажи на гасната инфраструктура.

Презентацијата разгледува и проширување на посебната вонредна легислатива која им овозможи на земјите-членки да го забрзаат доделувањето дозволи за соларни и ветерни електрани, се наведува во извештајот.

Следниот месец Европската комисија треба да објави предлог за тоа кои мерки треба да се продолжат.

Во моментов нема коментари за веста. Биди прв да коментира...

Остави коментар