.webp){kind=icon}
Бродскиот транспорт поскапува како што се зголемуваат тензиите во Црвеното Море, откако САД и Велика Британија започнаа воздушни напади против милитантите Хути поддржани од Иран во знак на одмазда за нивните напади врз трговските бродови.
„Алкоа Корп“ ќе ја објави заработка в среда, со што ќе го означи неофицијалниот почеток на сезоната за квартални известувања во светот на суровините, додека нагорниот тренд на цената на зрната какао продолжува.
Еве пет значајни графикони што треба да се земат предвид на светските пазари на суровини на почетокот на неделата.
Бродски транспорт
Поморските компании се повеќе го избегнуваат Црвеното Море поради ескалацијата на ситуацијата на клучниот глобален трговски коридор. Пред сојузничките напади во Јемен во петокот, цените на товарот веќе растеа поради интензивирањето на нападите. Индексот Drewry Composite – кој е пондериран просек од осум клучни рути – се зголеми за 122 отсто од 30 ноември, бидејќи бродовите се принудени да пловат по алтернативни води и да патуваат илјадници километри повеќе, што резултира со помалку бродови што превезуваат стока. Хутите ветија одговор, што претставува ризик за дополнително вознемирување на глобалните синџири на снабдување и натамошно зголемување на транспортните трошоци. Американски борбен авион во неделата собори крстосувачка ракета истрелана од територијата на Хутите во Јемен кон разурнувач на морнарицата во јужниот дел на Црвеното Море, според американската Централна команда.
Bloomberg Mercury
Земјоделство
Цената на какао продолжува да расте и по почетокот на новата година. Најактивните фјучерси во Лондон ја завршија 2023 година со најголем годишен раст во последните 15 години, додека договорите во Њујорк се зголемија за 61 отсто. И двата случаи растот продолжува во последните денови поради зголемената загриженост за падот на производството. Трговците ќе бидат фокусирани на клучните извештаи за обработката на какаото за последните три месеци од минатата година во Азија, Европа и САД, кои се сметаат за клучни. Слабите податоци за обработка би можеле да влијаат на цените бидејќи тоа би сигнализирало намалување на потрошувачката на дискреционите артикли како што е чоколадото. Фјучерсите на какаото во Лондон се стабилизираа во понеделникот, откако минатата недела растеа четири дена по ред.
Bloomberg Mercury
Природен гас
Испораките на течен природен гас се зголемија бидејќи производството се зголеми, а САД за прв пат станаа најголем извозник во светот минатата година. Но, администрацијата на Бајден – во услови на зголемен притисок од еколошките здруженија и законодавците да го исполни своето ветување за транзиција од фосилните горива – ги проценува климатските критериуми што ги користи за одобрување нови извозни проекти кои би можеле да го спречат подемот на индустријата. Постои „зголемен ризик дека процената ќе резултира со формално или неформално одложување или пауза во одобрувањата“, напиша во белешка Бенџамин Салисбери, аналитичар во „Хејт Секјуритис“.
Bloomberg Mercury
Заработки
„Алкоа“, најголемиот американски производител на алуминиум, треба да ги објави резултатите за четвртиот квартал по затворањето на деловните активности в среда. Акциите паднаа за 25 отсто во изминатата година бидејќи компанијата се бореше со оперативни прашања и проблеми со дозволите за боксит во Австралија, и бидејќи глобалните цени на алуминиумот едвај остварија добивка во услови на прекумерна понуда. Компанијата минатата недела соопшти дека планира да го запре производството во еден од трите капацитети во Западна Австралија, бидејќи почнува да размислува за мерки за намалување на трошоците. Инвеститорите ќе бараат насоки од извршниот директор Вилијам Оплингер за понатамошни оперативни приспособувања, како и за можното влијание што врз пазарот го има од континуираното зголемување на руските резерви на Лондонската берза за метали.
Bloomberg Mercury
Метали за батерии
Падот на суровините како што се литиум, кобалт и никел доведе до пад на цената на батериите што ги напојуваат електричните возила. Минатата година, просечните цени паднаа на 139 долари за киловатчас и се очекува да се намалат за дополнителни 6 долари за киловатчас во 2024 година, покажуваат податоците на „БлумбергНЕФ“. И покрај падот – благодат за потрошувачите – постои зголемена загриженост на пазарот. Прекумерниот капацитет доведува до пониски стапки на искористување на постројките, што пак влијае на маржите за производителите на батерии, предвидува „БНЕФ“.
Bloomberg Mercury
