.webp){kind=icon}
Брод што превезувал стока бил погоден со проектил во Црвено Море, што е нов знак за интензивирање на нападите врз трговските бродови по воден пат, за кој клучните индустриски групи предупредуваат дека останува премногу опасен за навигација.
Според „Амбри аналитика“, товарниот брод „Зографија“ во грчка сопственост бил погоден на околу 76 милји (122 километри) северозападно од Ал-Салиф, Јемен. Британската морнарица претходно соопшти дека властите го истражуваат инцидентот.
Од петокот, американската морнарица и групите за поморска трговија ги советуваа бродовите да се држат подалеку од јужниот дел на Црвено Море во близината на јеменскиот брег. Тоа е потег што предизвика нова рунда трговски нарушувања, бидејќи сè, од танкерите за нафта до бродовите за гас, почнува да ги обиколува илјадниците милји околу брегот на Африка. Соединетите Американски Држави објавија дека бродовите што пловат под нивно знаме треба да го избегнуваат водниот пат до понатамошно известување.
Бунтовниците Хути веќе неколку недели ги гаѓаат бродовите, потег за кој велат дека е одговор на израелската војна со Хамас. Откако САД и Обединетото Кралство започнаа воздушни напади против групата во Јемен минатата недела, раководството на Хутите најави дека на нишан ќе бидат бродовите од двете земји.
Не е јасно зошто бил погоден бродот во грчка сопственост. Се чини дека во минатото некои бродови - особено два брода со руска нафта - беа погрешна цел. „Зографија“ плови под знамето на Малта и е осигурена од норвешка компанија.
По денешниот напад, „Зографија“ го смени курсот, објави „Амбри“. Бродот претрпел штета кај товарниот простор, но можел да продолжи да плови. Откако влегол во Аденскиот Залив, бродот го исклучил сигналот за следење, но продолжил со сигналите откако минал низ теснецот Баб ел-Мандеб. Се чини дека бил погоден потоа.
Упорноста на нападите доведе до зголемување на трошоците за осигурување на бродовите што пловат во регионот. Стапките на ризик од војна се зголемија десеткратно во последните недели, на околу еден отсто од вредноста на бродот, изјавија во понеделникот лица запознаени со пазарот. Тоа значи дека брод од 100 милиони долари би требало да плати еден милион долари за да плови низ Црвено Море.
