Цената на нафтата продолжи да расте поради ескалацијата на тензиите на Блискиот Исток, откако во претходната сесија ја премина границата од 90 долари за барел.
Глобалниот репер брент се искачи на повеќе од 91 долар, блиску до највисокото ниво од октомври, додека вест тексас интермедиејт (ВТИ) беше околу 87 долари. Израел ги засили подготовките за потенцијална одмазда од Техеран по нападот во понеделникот врз ирански дипломатски комплекс во Сирија, поттикнувајќи ги стравувањата од поширок регионален конфликт.
Цената на суровата нафта годинава порасна за 18 отсто поради геополитичките тензии на Блискиот Исток и во Украина, како и поради ограничувањата во понудата на ОПЕК+ и здравата побарувачка. Конфликтот меѓу Израел и Хамас доведе до напади на Хутите врз бродови во Црвено Море, зголемувајќи ги трошоците за испорака, но досега не ескалира во поширока војна во регионот, кој обезбедува околу една третина од светските набавки на нафта.
Суровата нафта брент надмина 90 долари
Bloomberg
Преговорите за прекин на огнот меѓу Израел и Хамас - кои би можеле да доведат до ослободување на заложниците држени во Газа - остануваат блокирани. Израелскиот министер за економија рече дека не верува дека Катар ќе дејствува како посредник со Хамас.
„Пошироките тензии на Блискиот Исток, кои произлегуваат од војната во Газа, веројатно се највисоки во последните неколку месеци“, рече Вандана Хари, основачка на „Ванда инсајтс“ (Vanda Insights) во Сингапур. „Суровата нафта ја одразува премијата од стравувањата од пожар на Блискиот Исток“.
На почетокот на неделава ОПЕК+ одлучи да се придржува до намалувањето на понудата за првата половина од годината, одржувајќи ги глобалните пазари на работ и зајакнувајќи го аргументот за повисоки цени. Панелот од клучни членови предводен од Саудиска Арабија на онлајн состанок препорача да не се менува политиката. Тоа значи дека намалувањето на снабдувањето од околу два милиона барели дневно ќе остане во сила.
Набљудувачите на пазарот станаа поголеми оптимисти во последните недели. „ЏП Морган“ (JPMorgan Chase & Co.) предупреди дека брент има потенцијал да се зголеми до 100 долари за барел годинава, доколку неодамнешната одлука на Русија за намалување на производството не биде избалансирана со други контрамерки. Во меѓувреме АНЗ (ANZ Banking Group) ја зголеми својата тримесечна прогноза на 95 долари.
Цени:
Брент за испорака во јуни поскапе за 0,4 отсто, на 91,05 долари за барел, во 12.28 часот во Сингапур.
Терминските договори за првиот месец се зголемија за 4,1 отсто неделава, при што цените се насочени кон раст четврта недела по ред.
ВТИ за испорака во мај се зголеми за 0,3 отсто, на 86,83 долари за барел.
.webp){kind=icon}
