.webp){kind=icon}
Организацијата ОПЕК+ се согласи да го продолжи намалувањето на производството на нафта до 2025-та, истовремено поставувајќи временска рамка за укинување на некои од тие ограничувања во потег што може да влијае на цените на краток рок.
Договорот постигнат денеска во Ријад на некој начин ги надминува очекувањата на пазарот, продолжувајќи ги таканаречените „доброволни“ намалувања од клучните членки, вклучително Саудиска Арабија и Русија и до 2025 година. Сепак, исто така ќе почне да ги намалува кратењата на понудата порано отколку што предвидуваа некои набљудувачи на ОПЕК.
Пред состанокот, трговците и аналитичарите нашироко очекуваа продолжување на овие намалувања на понудата со цел да се неутрализира зголеменото производство од неколку ривали на организацијата, при што некои предвидуваа дека тие ќе продолжат до крајот на 2024 година. Според новиот договор, осумте држави кои ќе учествуваат во овие дополнителни ограничувања ќе додадат околу 750.000 барели дневно на пазарот до јануари.
Цените на суровата нафта неодамна бележат пад поради кревките економски изгледи во Кина која е најголем потрошувач и сомневањата за темпото на намалување на каматните стапки во големите индустријализирани економии. Фјучерсите на Брент достигнаа 81,62 долари за барел на 31 мај, што е пад од 7,1 отсто за месецот.
Намалувањата од приближно 2 милиона барели дневно на ОПЕК+, кои одигра клучна улога во поддршката на цените на суровата нафта над 80 долари за барел оваа година, требаше да истечат на крајот на јуни. Тие ограничувања ќе продолжат целосно во текот на третиот квартал, а потоа постепено ќе бидат укинувани во текот на следните 12 месеци, се вели во соопштението на саудиското Министерство за енергија.
Инаку „доброволните“ намалувања од страна на Организацијата на земји извознички на нафта и нејзините сојузници се дополнување на претходниот договор на целата групација со кој се ограничува производството на сурова нафта на околу 39 милиони барели дневно, што трае до крајот на оваа година. Групата, исто така, се согласи да го продолжи тој договор до крајот на 2025 година, се вели во соопштението на веб-страницата на ОПЕК. Обединетите Арапски Емирати, кои инвестираа многу во нови нафтени проекти во последниве години, добија зголемување од 300.000 барели дневно на целта за производство за следната година.
Пониските цени на нафтата понудија одредено олеснување за централните банки кои се борат со постојаната инфлација, но ги загрозуваат приходите за производителите како Саудиска Арабија. На кралството му се потребни цени близу 100 долари за барел за да ги финансира амбициозните планови за трошење на престолонаследникот Мохамед бин Салман, проценува Меѓународниот монетарен фонд. Паралелно со состанокот на ОПЕК+, саудиската влада ја заврши продажбата на акции во државниот нафтен гигант „Арамко“ во вредност од 12 милијарди долари, собирајќи средства за да помогне во плаќањето на планот за масовна економска трансформација.
