За прв пат една прачка злато вреди милион долари

Вредноста на една стандардна прачка злато за прв пат во историјата надмина милион долари. Пресвртницата беше достигната во петокот, кога цената на благородниот метал се зголеми на 2.500 долари за унца (troy ounce), што е рекорд на сите времиња. Со оглед на тоа што златните прачки вообичаено тежат околу 400 унци, тоа значи дека секоја од нив вреди повеќе од милион долари.

Постојат некои нијанси во однос на бројките. Имено, додека златните прачки на лондонскиот пазар - глобалниот центар за тргување со благородни метали - вообичаено тежат околу 400 унци, тие можат да содржат од 350 до 430 унци чисто злато, според Здружението за златни прачки на лондонскиот пазар. Исто така, можно е поединците да купат многу помали, попристапни прачки односно плочки како што се оние што ги продава „Костко“ (Costco).

Во првата половина од оваа година, нето-купувањето злато од страна на централните банки изнесуваше 483,3 тони, што е еквивалентно на речиси 40.000 прачки, според пресметката на „Блумберг“ при која се користени бројките од консултантската куќа „Металс фокус“ (Metals Focus). Тоа е еден од факторите што го поддржа засилениот раст на благородниот метал досега оваа година, заедно со очекувањата за полабава монетарна политика од Федералните резерви на САД.

Во моментов нема коментари за веста. Биди прв да коментира...

Остави коментар