Во Јужна Кореја има автомати за продажба на златни прачки

На аголот на прометната улица во богатиот кварт Гангнам во Сеул, има продавница со вообичаените понуди: списанија, тоалетна хартија, голем избор на пијалоци. Но, до касата се наоѓа висок автомат кој продава многу понеочекуван производ - злато.

Автоматот во продавницата ГС (GS Retail) продава златни прачки од дури 37,5 грама до помалку од еден грам. Цените се менуваат секојдневно, одразувајќи ги пошироките пазарни трендови, но почнуваат од околу 88.000 вони (60 евра) за прачки од 0,5 грама.

Автоматите се присутни на национално ниво во 30 продавници во сопственост на компанијата, шест пати повеќе отколку кога започна услугата во 2022 година.

„Во моментов имаме околу 30 милиони вони (20,3 илјади евра) продажби месечно“, изјави преку порака портпаролот на ГС. „Автоматот за злато го привлекува вниманието на купувачите поради зголемената побарувачка за безбедни инвестиции и постојано присутниот тренд на микроинвестирање“.

Јужнокорејците не се исклучок кога станува збор за овие светски трендови. Во Обединетото Кралство, 65 проценти од генерацијата зед и милениумците се отворени за инвестирање во фракциони акции или дел од акции на одредена компанија, според извештајот на Чарлс Шваб од 16 мај. Малопродажните инвеститори ширум светот се собираат за да купат сè, од мем акции до криптовалути. За Јужнокорејците, физичкото злато е само уште една опција.

Локалните инвеститори „се плашат да не ги пропуштат можностите, а тоа делумно придонесе за оваа ситуација“, вели Парк Санг-хјун, економист во ХИ (HI Investment & Securities) во Сеул, истакнувајќи го неодамнешниот скок што ја турна пазарната цена на златото на историски максимум од повеќе од 2.400 долари за унца минатиот месец. „Чувството на несигурност за глобалната економија ја поттикнува побарувачката за сигурни опции за инвестирање“, додава тој.

Предност на златото од локалната порадавница

ГС не е единствениот синџир продавници што продава злато во Јужна Кореја. Ривалскиот бизнис ЦУ (CU) започна со продажба на три вида ултралесни златни картички на 1 април. Беа потребни само два дена за да се распродадат грам-картичките, според БГФ (BGF Retail), компанијата што го води синџирот, а најголемата побарувачка доаѓа од клиенти во 30-тите години.

Brendon Thorne/Bloomberg

Според портпаролот на БГФ, 95 отсто од понудените 770 златни производи биле продадени до 31 мај. „Продажбата се забрза бидејќи златните производи со фиксна цена на ЦУ станаа поевтини од пазарот“, се вели во соопштението на БГФ. Малопродажниот ланец во иднина ќе воведе поголеми опции за тежина, од два до 10 грама, но не прецизираше датум.

Трендот на продажба на злато покрај предмети за домаќинство и газирана вода го привлече вниманието и на Американците. Минатото лето американската компанија „Костко“ (Costco) почна да нуди златни прачки. Сега, дури и со ограничување од два по купувач, прачките од 28 грама или една унца, кои се ценети врз основа на пазарната цена, се продаваат за неколку часа.

Во Кореја, онлајн банките исто така се обидуваат да бидат во чекор со побарувачката за злато. „Кбанк“ (Kbank), една од трите јужнокорејски онлајн банки со повеќе од 10 милиони корисници, на 9 мај лансираше услуга која им овозможува на корисниците на нејзината апликација да купуваат златни прачки од 1,875 до 37,5 грама со бесплатна испорака.

„Со оглед на тоа што цената на златото неодамна достигна 2.400 долари за унца, инвестирањето во злато стана популарен начин“, се вели во соопштението на банката, додавајќи дека планира да ја прошири услугата на златни монети и сребро до крајот на годината.

Корејската централна банка не е во игра

Еден ентитет кој нема да започне со инсталирање автомати за златни прачки е Централната банка „Хангук“ (Hanguk Eunhaeng). Корејската централна банка не го купила металот од 2013 година. На крајот на 2023 година имала 104,4 тони злато, според извештајот на новинската агенција „Јонхап“. Во меѓувреме, во првиот квартал од 2024 година, побарувачката на потрошувачите на Јужна Кореја за прачки се зголеми за 16 отсто во однос на година претходно, на 8,6 тони.

Слично на тоа, „рекордно високата цена на златото го поттикна интересот на инвеститорите во Јужна Кореја“, напиша Светскиот совет за злато во својот квартален извештај, истакнувајќи дека побарувачката на прачки во земјата се зголеми за 27 отсто во првиот квартал од 2024 година во однос на претходната година. „Тоа беше најсилниот квартал за јужнокорејските инвестиции во повеќе од две години“, се додава во извешајот.

Bloomberg Mercury

„Златото не е толку корисно како традиционалните средства како што се обврзниците и акциите во однос на управувањето со девизните резерви“, напиша Ванхо Чои, шеф за планирање на управувањето со резервите на банката, во блог пост за да го објасни ставот на банката.

„Банката не купува злато од 2013 година, што доведе до одредени критики дека пропуштаат можност за инвестирање“, додаде Чои на официјалниот блог на банката. „На централните банки не им е лесно да продаваат злато за ликвидни цели поради ризикот за репутацијата, така што одлуката за инвестирање бара внимателно разгледување на многу фактори“.

„Инвеститорите кои ги вложуваат своите пари во средства како што се американските трезори и јапонскиот јен, не го добија повратот што го сакаа од минатата година“, забележува Сеокхјун Паик, економист во банката „Шинхан“  (Shinhan). Потоа тие се насочија кон златото“.