Кафето сè поскапо, сортата арабика достигна највисока цена од 1997 година

Фјучерсите за кафе во Њујорк достигнаа највисоко ниво од 1997 година поради загриженоста за посевите кај најголемите производители, што може дополнително да ги зголеми трошоците за преработувачите и за потрошувачите.

Арабика, висококвалитетната сорта што се користи за специјални пијалаци, порасна за три отсто во понеделникот. Цените на кафето годинава значително пораснаа поради големите нарушувања во снабдувањето кај клучните производители од Бразил до Виетнам, при што поевтината сорта робуста, која се користи во инстант пијалаци, неодамна достигна највисоко ниво од 70-тите години на минатиот век.

Загриженоста дека снабдувањето од Бразил ќе забави се зголеми поради долгата суша, која ги оштети растенијата, што може да го намали производството следната сезона.

Bloomberg

Потенцијалот за жетвата следната година „секако е погоден од долгите суви и топли периоди што ги зафатија посевите на арабика до септември“, напиша во извештај аналитичарот на „Рабобанк“ (Rabobank) Гилерме Морија.

Тоа останува важен фактор дури и по дождовите во октомври, кои доведоа до „одлично цветање“ на дрвјата, додаде Морија. Сега постојат стравувања дека цветовите нема да се задржат на гранките, што го става во опасност родот бидејќи цветовите подоцна се развиваат во зрна што содржат кафе.

Дополнителен притисок е можноста дека силното темпо на извоз на арабика годинава може да резултира со ниски резерви до крајот на тековната сезона. Службата за странски земјоделски работи на Министерството за земјоделство на САД предвидува дека резервите од кафе во Бразил ќе достигнат само 1,2 милион вреќи кога ќе заврши тековната сезона во јуни, што е намалување од 26 отсто во споредба со претходната година.

Растот на цените на кафето нагласува како некои земјоделски производи сè уште ги притискаат буџетите на потрошувачите, иако пошироките трошоци за храна се повлекоа од рекордно високото ниво поставено на почетокот на 2022 година. Низ синџирот на снабдување, продавачите ги зголемија цените и ги укинаа попустите за да ги заштитат своите маржи, со предупредувања за дополнителни зголемувања.

Фјучерсите на арабиката пораснаа за 2,4 отсто, на 3,0935 долари за фунта, до 10.23 часот во Њујорк. Годинава цените пораснаа за 64 отсто.