Златото е годинашниот рекордер на пазарите на метали, со раст од 27 отсто

Златото е на праг да оствари една од своите најголеми годишни добивки овој век, со раст од 27 проценти, кој главно е поттикнат од американското монетарно олеснување, одржливите геополитички ризици и бранот купувања од централните банки.

И покрај тоа што златните прачки загубија дел од вредноста по убедливата победа на Доналд Трамп на претседателските избори во САД во ноември, сепак добивката на благородниот метал во текот на 2024 година сè уште го надминува мноштвото други стоки. Основните метали имаа мешана година, додека железната руда падна, а маките на литиумот се продлабочија.

Bloomberg Mercury

За 2025 година инвеститорите се фокусирани на неизвесноста околу американската монетарна политика, потенцијалните потреси од претседателството на Трамп и напорите на Кина да го заживее растот.

Силните добивки на златото годинава, со кои металот постави низа рекорди, може да сигнализираат можна промена во динамиката на пазарот со оглед на тоа што растот се случи и покрај посилниот американски долар и зголемувањето на реалните приноси на државните хартии од вредност, кои вообичаено се движат во спротивставена насока.

„Благородниот метал е извонреден и немилосрден, што го прави мое најголемо пазарно изненадување за 2024 година. Играта со златото изгледа дека е променета“, наведува во својата пишана анализа Дејвид Скат, аналитичар во „Стоун икс“ (StoneX Group Inc.). 

Другите метали во голем дел се мачат поради продолженото економско забавување на Кина.

• Индексот LMEX, кој е составен од шест метали на Лондонската берза за метали, е на пат да оствари скромна годишна добивка поради послабата кинеска побарувачка, особено за бакар и цинк, тренд што може да се задржи и во 2025 година.
   
• Вредноста на железната руда опадна бидејќи слабата градежна активност ја турна во криза кинеската челична индустрија, која е најголема во светот, а на повидок има само мало олеснување. Фјучерсите на железната руда во Сингапур паднаа за околу 28 отсто во текот на 2024 година.
   
• Литиумот, кој се користи за производство на батерии, е на пат да оствари втор последователен остар годишен пад бидејќи сериозната тековна глобална презаситеност во снабдувањето е дополнета со турбуленции во индустријата за електрични возила.

На денешното тргување вредноста на златото се движи на ниво од околу 2.620 долари за унца, што инаку е значајно пониско во споредба со октомврискиот врв од над 2.790 долари. Фјучерсите за железна руда во рамките на азиското тргување денеска се за два отсто повисоки и изнесуваат 100,85 долари за тон, а бакарот порасна за 0,2 отсто, на 9.000 долари за тон.

Во моментов нема коментари за веста. Биди прв да коментира...

Остави коментар