ИНГ: Тензиите меѓу САД и Кина ќе ја зголемат силата на златото во 2025 година

Тензиите меѓу САД и Кина може да влијаат на пазарите на енергија и стоки следната година, додека изгледите за златото остануваат светли, прогнозира ИНГ (ING Groep NV).

Ветувањата на новоизбраниот претседател Доналд Трамп за воведување тарифи за трговските партнери и можната одмазда може да ги нарушат пазарите, вклучувајќи ги и нафтата, металите и земјоделските производи, бидејќи трговците бараат стимулативни мерки од Кина за да се поттикне потрошувачката, истакна заемодавецот во својата прогноза за 2025 година.

„Потенцијалот за ескалација на трговските тензии претставува надолен ризик, додека пазарите чекаат да видат дали и кога поддршката од кинеските мерки ќе стигне до пазарите на суровини“, наведуваат Ворен Патерсон и Ева Ментеј во извештајот.

Иако е мала веројатноста дека Трамп ќе стори нешто многу во делот што се однесува на производството на нафта во САД, сепак суровата нафта ќе се најде под притисок од силниот раст на понудата надвор од ОПЕК (Организацијата на земји извознички на нафта), а ИНГ смета дека следната година цената на нафтата брент ќе се лизне до просечно ниво од 71 долар за барел во однос на сегашниот просек од околу 74 долари. Во меѓувреме, новите фабрики за извоз на течен природен гас во САД веројатно ќе ги зголемат домашната побарувачка и цените, а истовремено ќе ѝ овозможат на Европа полесно да ги надомести руските резерви, што ќе доведе до пониски цени на природниот гас во регионот, под претпоставка дека ќе има нормална зима.

Златото треба да ја продолжи годинашната серија на постигнување последователни рекорди во однос на геополитичките грижи, со просечна цена од 2.760 долари за унца во 2025 година, што е над сегашното ниво од околу 2.713 долари, прогнозираат од ИНГ. Притоа, златните прачки најмногу ќе ги купуваат централните банки што сакаат да ги диверзифицираат своите девизни резерви, додека зголемената трговија и геополитичкото тензии може да ја зголемат привлечноста на златото. Моментално златото се тргува по цена над 2.720 долари за унца.

Изгледите за индустриските метали се помрачни. Трговските потези, потенцијалните промени во климатските закони од страна на актуелниот американски претседател Бајден и кинеската побарувачка веројатно ќе играат значајна улога за овие суровини, сметаат од ИНГ. Просечната цена на бакарот се проценува да биде 8.900 долари за тон во 2025 година наспроти сегашните 9.200 долари. Житарките веројатно ќе бидат клучна цел во какви било спорови, додека временските услови продолжуваат да вршат притисок врз евтините производи, при што цените на какаото и кафето дополнително ќе осцилираат следната година.

Инаку, основните метали и железната руда пораснаа пред завршувањето на клучниот политички состанок во Кина, каде што се очекува лидерите да ги одредат економските приоритети за следната година.

Дводневната економска конференција во Пекинг има цел да воспостави похрабра стимулација на економијата. Тоа ги привлече купувачите на стоки со надеж дека најголемиот светски потрошувач на суровини се подготвува да воведе низа мерки за да се спротивстави на забавувањето на домашниот раст и потенцијалните трговски судири со администрацијата на старо-новиот американски претседател Трамп.

Bloomberg Mercury

Никелот поминува најдобро на Лондонската берза за метали, со раст од 1,4 проценти на својата вредност, искачувајќи се на 16.075 долари за тон, додека бакарот поскапе за 0,6 отсто, на 9.245 долари за тон. Цената на железната руда за производство на челик се зголеми за 0,9 проценти, на 105,5 долари за тон во Сингапур.

Економистите предвидуваат дека кинеската влада најверојатно ќе го прекине сегашниот начин на постепено стимулирање и ќе премине кон поагресивен, искористувајќи ги поодлучно своите овластувања.

„Блумберг економикс“ (Bloomberg Economics) соопшти дека очекува Пекинг да преземе најсилен стимул во последните години за да ја поттикне економијата. Главниот азиски економист Чанг Су не очекува детали од работната конференција, ама смета дека креаторите на политиката ќе покажат посветеност во носењето мерки за поттикнување на растот.