„Арчелор Митал“ бара трговски мерки за справување со конкуренцијата од Кина

„Арчелор Митал“ (ArcelorMittal SA) повика на посилни трговски мерки за справување со напливот од кинески извоз на челик, што велат дека го прави пазарот неодржлив со цени во Европа далеку под маргиналните трошоци.

Производителите на челик тешко се справуваат со бранот евтин увоз од Кина, каде што анемичниот градежен сектор влијаеше на цените. Кина произведува повеќе од една милијарда тони годишно, што чини повеќе од половина од светското производство, но има премногу челик, а истовремено и премала побарувачка на домашниот пазар.

Остатокот од светот ризикува да стане депонија за вишокот кинеско производство, намалување цени и гасење погони.

„Загрижува зголеменото ниво на увоз во Европа и итно се потребни посилни трговски мерки за да се реши тоа“, рече денеска главниот извршен директор на „Арчелор Митал“, Адитја Митал.

Сепак, од најголемиот светски производител на челик, покрај Кина, велат дека има поголем оптимизам за втората половина на 2024 година, споредено со истиот период од лани.

„Побарувачката се очекува да биде посилна во втората половина на годинава во споредба со 2023 година, а нивоата на резерви се ниски, што укажува дека ќе дојде до обновување на резервите кога реалната побарувачка ќе закрепне“, рече извршниот директор.

„Арчелор Митал“ објави заработка во третиот квартал пред камати, даноци и амортизација од 1,58 милијарда долари, надминувајќи ги процените на аналитичарите од 1,47 милијарда долари.