Раст на активноста на фабриките во Кина, но и на трговските ризици

Кинеската фабричка активност во февруари се врати во експанзија, што е знак на отпорност на економијата погодена од повисоките царини на САД и слабата домашна побарувачка.

Официјалниот индекс на менаџери за набавки во производството беше 50,2, наспроти 49,1 колку што изнесуваше во јануари, објави денеска Националното биро за статистика. Просечната прогноза на економистите анкетирани од „Блумберг“ беше 49,9. Во оваа метрика секоја бројка над 50 поени сигнализира раст.

Мерката на активност во градежништвото и услугите се искачи на 50,4 од 50,2 минатиот месец, соопшти статистичкото биро. Тоа е во согласност со прогнозата на економистите од 50,4.

Овие бројки се првите официјални податоци достапни секој месец, кои обезбедуваат слика за состојбата на кинеската економија, чии изгледи се менуваат како што се интензивира трговската војна со САД. Стабилизирањето на фабричката активност во февруари значи помал притисок врз кинеската влада да ги забрза стимулативните мерки во производствениот сектор кога највисоките функционери ќе се состанат во Пекинг оваа недела на годишниот парламентарен состанок.

Администрацијата на Трамп ја нападна Кина со низа потези кои вклучуваат инвестиции, трговија и други прашања, а неодамна се закани со дополнителна царина од 10 отсто, кои ќе стапат на сила на 4 март.

Претседателот на Кина, Шји Џјинпинг, ги повика официјалните лица да останат присебни во услови на домашни и глобални предизвици, сигнализирајќи дека Пекинг ќе преземе одмерен пристап кон новите ограничувања наметнати од САД.

Шји неодамна беше домаќин на состанок со технолошките шефови, вклучувајќи го и коосновачот на „Алибаба“ (Alibaba Ltd.), Џек Ма, во обид да ја врати довербата од приватниот сектор. Некои економисти очекуваат на претстојниот состанок на националниот парламент да се донесат мерки за поттикнување на потрошувачката.
Кинеската економија во 2024 година порасна повеќе од очекуваното благодарение на бранот стимулативни политики и извозниот бум. Но, закрепнувањето остана нерамномерно, со производство кое на моменти беше светла точка, додека потрошувачката беше намалена од слабиот пазар на труд и долготрајната криза со недвижностите.

Трговскиот суфицит на Кина минатата година се искачи на речиси невиден еден трилион долари. Растечката нерамнотежа ги исплаши трговските партнери на нацијата, кои го обвинуваат Пекинг за градење на вишок капацитети во своите индустрии преку државни субвенции и сè повеќе се обидуваат да подигнат нови бариери кои може да ја запрат продажбата на клучните производи, како што се електричните возила.

Во моментов нема коментари за веста. Биди прв да коментира...

Остави коментар