Германија се штити од кинеската конкуренција во ветерната индустрија

Германија презема мерки за заштита на домашната и пошироката европска индустрија со ветерници бидејќи се зголемува стравот дека и тука кинеската конкуренција ќе ги помати работите.

Министерството за економија постави акциски план за да обезбеди еднакви услови за игра во секторот, да ја подобри сајбер-безбедноста и да ја намали зависноста од критичните компоненти. Најавата дојде откако креаторите на политиката се сретнаа со претставници на европските производители на ветерни турбини и ја истакнаа потребата особено внимателно да се испитаат кинеските производители вклучени во европските проекти.

„Имаме силна ветерна индустрија во Германија и во Европа. Мора да продолжиме да ги подобруваме рамковните услови за оваа индустрија за да остане конкурентна и да се создадат услови за идно создавање вредност во Германија и во Европа“, рече министерот за економија Роберт Хабек.

Претходно годинава германски развивач на офшор ветерни електроцентрали избра кинески производител за снабдувач на турбините потребни за проект во Северно Море, што предизвика контрола од германската влада и реакција од претставниците на индустријата во Европската Унија (ЕУ).

Регионот веќе се соочи со штети во индустријата со соларна енергија поради конкуренцијата од евтините кинески панели и стана почувствителен на влијанието на трета земја врз секторите што се сметаат за стратегиски откако руската војна против Украина го намали протокот на гас на континентот.

Министерството за економија соопшти дека ќе обезбеди големи банкарски гаранции преку својата државна банка КфВ (KfW) за производителите на турбини на ветер. Исто така ги повика КфВ, Европската банка за обнова и развој (ЕБОР) и Европската инвестициска банка (ЕИБ) да ги преиспитаат финансирањата на кинеските компании што „се спротивни на интересите на националните или европските индустриски политики и основно се осомничени за нарушување на пазарната конкуренција“.