Отворен првиот приватен парк на ветерни електрани „Богословец“

Во присуство на амбасадорот на ЕУ во Македонија, Дејвид Гир, заменик амбасадорот на Германија, Ото Граф и претставници на ГГФ (Green for Growth Fund) во атарот на светниколското село Богословец денеска свечено беше отворен паркот на ветерни електрани „Богословец“. Проектот е вреден 61 милион евра, развиен е од „Тор Импекс“ (THOR Impex) и е првиот приватен ветерен парк во земјава. Ветерниците имаат капацитет од 36 MW и може да напојуваат со електрична енергија над 20.000 домаќинства годишно.

Амбасадорот на ЕУ, Гир истакна дека се надева дека оваа прва приватна инвестиција во ветро-парк ќе биде вовед во уште многу инвестиции во чиста енергија и во одржлив економски развој. Забележа дека земјава има можности и изболува со искористување на енергијата од ветер, сонце и вода.

„Западниот Балкан има големи природни предности во делот на ветерна, хидро и соларна енергија и огромни можности за приватни инвестиции, надополнувајќи ги и надминувајќи ги инвестициите од ЕУ и останатите партнери“, рече Гир.

Тој додаде дека важно е властите и приватните компании заедно да работат и конструктивно да покажат дека секторот на обновливи извори на енергија максимално го искористува овој потенцијал.

„Токму овој проект демонстрира како тоа може да биде сторено, здружувајќи локални и компании од ЕУ и банки. Бенефитите ќе бидат долгорочни како за животната околина, така и за граѓаните. Овој проект ќе ги намали емисиите на јаглерод диоксид за 80 илјади тони годишно и ќе обезбеди чиста енергија за 20.000 домаќинства“, рече Гир.

Граф посочи дека ветерниот парк „Богословец“ претставува голем чекор кон воспоставување на обновливите извори на енергија како значителен дел од снабдувањето со електрична енергија во државава.

„Оваа приватна инвестиција покажува дека инвестиции во обновливи извори на енергија не секогаш се возможни само со јавни финансии и со државна поддршка туку многу добро се возможни како приватни иницијативи и како бизнис и сметаме дека овој проект е огромен чекор напред кон тоа обновливите извори на енергија огромен дел од снабдувањето со електрична енергија во Северна Македонија“, рече Граф. 

Михајло Михајловски од „Тор Импекс“ рече дека веќе имаат визија за инвестиција во нов проект и се надева дека за година и пол свечено ќе се отвори и вториот ветро-парк „Богословец 2“.

„Она што е особено важно е дека станува збор за македонска инвестиција, македонски капитал кој и понатаму ќе остане во државата да создава дополнителна вредност и да биде извор на идни големи инвестициски проекти“, вели Михајловски.

Ветерниот парк Богословец беше поддржан од „Ерсте Груп“, „Комерцијална Банка“, „НЛБ Банка“, „Шпаркасе банка“ со финансии во вкупен износ од 41 милион евра и „ОеЕБ“, развојна банка на Република Австрија кои во финансирањето на овој проект учествуваат со 10 милиони евра.

Во моментов нема коментари за веста. Биди прв да коментира...

Остави коментар