Ветерен парк со 55 ветерници, кои ќе произведуваат еден терават-час електрична енергија (или 20 проценти од потребите на земјава), ќе се гради меѓу Карбинци, Штип и Радовиш. Изградбата се очекува да започне во втората половина на 2025 година, а со оваа странска инвестиција на „Алказар енерџи“, вредна над 500 милиони долари, се очекува да се отворат нови 630 работни места.
Ветерниот парк, како што беше посочено на денешната промоција на инвестицијата, ќе произведува електрична енергија со која ќе се задоволат потребите на околу сто илјади домаќинства.
Според премиерот Христијан Мицкоски, станува збор за најголема инвестиција во делот на обновливите извори во регионот.
Христијан Мицкоски
МИА
„Ваквиот почеток на мандатот со ваква инвестиција покажува дека како влада сме насочени кон проекти што се во интерес на граѓаните. Со завршување на овoј проект дури стотина илјади македонски семејства ќе може да се снабдуваат со електрична енергија од овие ветерници. Овој проект е значаен од многу аспекти - со него значително ќе се зајакне енергетската независност, што е наша цел, ќе се зголеми обемот на инвестиции и ќе отвори пат за нови инвестиции“, рече Мицкоски.
Тој додаде дека целта на Владата е земјата да стане енергетски независна во делот на електричната енергија, а, според него, тоа може да се реализира со детален план.
Презентација на инвестицијата на „Алказар енерџи“
МИА
Министерката за енергетика Сања Божиновска најави програма за грантови и поволни кредити за 150 илјади домаќинства во еден мандат за сопствениците на приватните куќи и станови.
„Поддршката ќе се однесува на поставување нови енергетски ефикасни фасади, прозорци и врати, исто така и субвенции за граѓаните до 50 проценти од цената за набавка и инсталација на енергетски ефикасна опрема. Домаќинствата ќе имаат можност да го продаваат вишокот од произведената електрична енергија по подобри услови со промена на постојната регулатива. Предвидуваме и промени во начинот на пресметка за исплата на продадената вишок произведена енергија“, посочи Божиновска.
„Алказар енерџи“ е водечки независен одржлив фонд со седиште во Луксембург и тим на советници со седиште во Дубаи, кои се фокусираат на големи проекти за обновлива енергија на пазарите во развој.
.webp){kind=icon}
Во моментов нема коментари за веста. Биди прв да коментира...