Растат загубите на бакарот по заканите од Трамп за увозни царини

Цената на бакарот падна откако американскиот претседател Доналд Трамп рече дека планира да воведе увозни царини за металот, како и за алуминиумот и челикот, што ги зголеми стравувањата од трговски војни и ја зајакна вредноста на доларот.

Трамп го вети тоа во говорот во кој исто така се закани со давачки за компјутерски чипови и фармацевтски производи, а во обид да го поттикне домашното производство. „Фајненшл тајмс“ објави дека министерот за финансии Скот Бесент се залага за универзални царини за увозот во САД и тие да започнат од 2,5 отсто и постепено да се зголемуваат, цитирајќи неименувани извори. Трамп потоа рече дека сака сеопфатни давачки што се „многу поголеми“ од тоа.

Доларот зајакна, поскапувајќи ги артиклите чија вредност се изразува во зелената валута. Цената на алуминиумот и железната руда скромно се намали, а недостигот од големи реакции кај металите во врска со заканите за царини може да се должи на острите загуби во понеделникот.

Движење на цената на бакарот Bloomberg Mercury

Какви било увозни царини на метали најверојатно најмногу ќе ја погодат Канада. Северниот сосед на САД има удел од нешто повеќе од половина од вредноста на увозот на алуминиум во 2023 година, се наведува во белешката на „Морган Стенли“(Morgan Stenley). Канада е втора, зад Чиле, како извор на бакар и е најголем странски снабдувач на челик во САД, а потоа следуваат Мексико и Јужна Кореја.

Индустриските метали се под притисок бидејќи трговците го одмеруваат потенцијалот за продолжен трговски конфликт, кој ќе го забави глобалниот раст и ќе ѝ наштети на побарувачката. Во Кина фабричката активност во јануари се намали по тримесечната експанзија, што сигнализира претпазливост кај домашните потрошувачи, додека нејзиниот сектор за недвижности покажува мали знаци за одржливо враќање.

Цената на бакарот падна за 0,5 проценти, на 9.049,50 долари за тон на лондонската берза за метали. А вчера во Сингапур падна дури за два отсто. Вредноста на алуминиумот се намали за 0,4 проценти, а на цинкот за 0,9 отсто. Фјучерсите за железна руда паднаа за 0,4 отсто, на 103,20 долари за тон во Сингапур.

Во моментов нема коментари за веста. Биди прв да коментира...

Остави коментар