„Рио Тинто“ (Rio Tinto Group) и „Гленкор“ (Glencore Plc) одржаа почетни разговори за комбинирање на нивните бизниси за да создадат гигант што ќе му конкурира на долгогодишниот титан во индустријата БХП (BHP Group).
Разговорите се одржале кон крајот на минатата година, но моментално не се активни, според луѓе запознаени со ситуацијата, кои побараа да останат анонимни. „Рио Тинто“ е втората најголема рударска компанија во светот, со пазарна вредност од околу 103 милијарди долари на крајот на тргувањето во Лондон во четвртокот, додека „Гленкор“ е проценет на околу 55 милијарди долари. БХП вреди околу 126 милијарди долари.
Потенцијалната комбинација на двете компании би била најголемата рударска зделка досега, но секоја трансакција би била сложена и би се соочила со повеќе потенцијални пречки. Додека „Гленкор“ има големи ресурси на бакар во време кога најголемите производители во светот се обидуваат да ги прошират своите активност кон металот клучен за енергетската транзиција, исто така поседува огромен бизнис со јаглен, кој веројатно не би бил привлечен за „Рио“. Главниот извршен директор на поголемата рударска компанија постојано изразува претпазливост за големи зделки, а двете компании имаат многу различни култури.
Претставниците на „Рио“ и на „Гленкор“ одбија да коментираат. Акциите на „Рио“ во Сиднеј паднаа за 1,8 отсто во раното тргување во петокот. „Гленкор“ порасна за 3,4 отсто на отворањето во Лондон.
Рударската индустрија беше зајакната од бран на зделки во последните неколку години, главно поттикнати од желбата на најголемите производители да се прошират кон бакарот - клучен метал за глобалните напори за декарбонизација.
И „Гленкор“ и „Рио“ поседуваат некои од најдобрите бакарни рудници во светот. Сепак, „Рио“ - како и БХП - сè уште се потпира значително на железната руда за да ги движи своите профити, во време кога деценискиот градежен бум во Кина се приближува кон крајот и пазарот на железна руда изгледа дека ќе влезе во продолжен период на слабост.
Историјата се повторува
„Гленкор“, кој претходно предложи спојување со „Рио“ во 2014 година, беше еден од најагресивните играчи во секторот. Неговиот поранешен извршен директор Иван Гласенберг, кој ја предводеше претходната иницијатива кон „Рио“, сè уште поседува речиси 10 отсто од компанијата.
„Интересно е како историјата се повторува“, вели аналитичарот на РБЦ (RBC Capital Markets) Бен Дејвис. „Особено бидејќи оттогаш тргнаа по многу различни патишта“.
Во изминатата деценија „Рио Тинто“ се обиде да се оддалечи од фосилните горива. Компанијата целосно се повлече од рударството на јаглен и, наместо тоа, се фокусира на развој на бизнисите со бакар и литиум. За разлика од неа, „Гленкор“ повеќе се насочи кон јаглен, вклучувајќи и купување рудници од „Рио“.
„Гленкор“ направи неуспешен обид да ја купи „Тек ресорсес“ (Teck Resources Ltd.) во 2023 година, но наместо тоа, се задоволи со јагленската единица на помалата компанија. Минатата година БХП се обиде да ја купи „Англо Американ“ (Anglo American Plc) во зделка вредна 49 милијарди долари - што ја принуди „Англо“ да ја забрза ревизијата на својот бизнис како дел од својата одбранбена стратегија - пред да се повлече на крајот со празни раце.
Бакарот е централен за брановите на зделки што го зафаќаат секторот. Најголемите рударски компании очајно се обидуваат да се стекнат со повеќе бакар, кој е фаворизиран од инвеститорите, но постојните рудници стануваат постари и со понизок квалитет, додека новите се тешки за наоѓање и скапи за изградба.
Купувањето на „Гленкор“ би му дало на „Рио“ удел во рудникот Колахуаси во Чиле, едно од најбогатите наоѓалишта, кое компанијата го посакува повеќе од една деценија. Уделот на „Англо“ во истиот рудник беше главен мотив за предлогот за преземање на БХП минатата година, додека „Блумберг“ претходно извести дека „Рио“ им понудил на „Гленкор“ и на „Англо“ да ги купи нивните удели во рудникот за време на падот на цените на стоките во 2015 година.
Комбинацијата на двете компании би го создала најголемиот ентитет за бакар, според аналитичарот на „Блумберг интелиџенс“ Грант Спор.
Прочитајте повеќе на овој ЛИНК.
.webp){kind=icon}