Русија го запре гасот преку Северен тек

Русија денеска ја запре испораката на гас за Европа преку гасоводот Северен тек 1. Европа е информирана дека „Гаспром“ ќе го затвори гасоводот Северен тек 1 кон Германија од 31 август до 3 септември.

Руската енергетска компанија пред десет дена најави целосно исклучување кое ќе трае 72 часа. Работата на Северен тек ќе ја вршат заеднички „Гаспром“ и „Сименс“, чија компонента ќе се сервисира.

„Единствената исправна пумпна единица Трент 60 ќе биде запрена три дена поради превентивно одржување“, се вели во соопштението на руската нафтена компанија.

Низа рутински процедури, во согласност со актуелниот договор за одржување, ќе извршат експерти на компанијата заедно со колегите од „Сименс“, прецизира „Гаспром“.

Податоците од веб-страницата на операторот Северен тек 1 покажуваат дека протокот бил на нула во периодот од 4 до 5 часот рано утринава.

Европските влади стравуваат дека Москва би можела да го продолжи овој прекин со цел да врати за санкциите што беа воведени против Русија по инвазијата врз Украина. Тие го обвинуваат рускиот претседател Владимир Путин дека ги користи енергетските резерви како „воено оружје“, додека Москва ги негира таквите тврдења.

Рускиот прекин и намалувањето на снабдувањето ги зголемија цените на гасот и ги принудува европските влади да се борат за алтернативни испораки пред зимата.

Понатамошните ограничувања во снабдувањето со гас во Европа би ја влошиле енергетската криза која веќе доведе до пораст на големопродажните цени на гасот за повеќе од 400 отсто од август минатата година, зголемувајќи ги трошоците за живот за потрошувачите и бизнисите и принудувајќи ги владите да трошат милијарди за да ги олеснат овие оптоварувања.

Во моментов нема коментари за веста. Биди прв да коментира...

Остави коментар