ОПЕК+: Стагнација на производството на нафта во 2026 година

ОПЕК + се согласи да направи уште едно мало зголемување на производството во декември, но ќе паузира со понатамошни зголемувања во наредните три месеци.

Клучните членки, предводени од Саудиска Арабија, се согласија за време на видео-конференција во недела да вратат околу 137.000 барели дневно следниот месец, како што беше очекувано, што е во согласност со зголемувањата планирани за октомври и ноември. Сепак, групата објави дека ќе се воздржи од понатамошни зголемувања од јануари до март. Предлогот беше покренат поради послабата сезонска побарувачка, според еден делегат.

Организацијата на земјите извознички на нафта и нејзините партнери постепено го враќаат производството од 1,65 милиони барели дневно, кое беше стопирано пред две години.

Сепак, се појавуваат знаци дека долгоочекуваниот вишок на понуда конечно се појавува, со предупредувања за уште поголем вишок следната година.

Средбата се одржа во услови на зголемен притисок врз Русија, ко-лидер на алијансата, откако САД минатиот месец ги санкционираа нејзините две најголеми нафтени компании, што претставуваше значителна ескалација. Иако потегот помогна да се стабилизираат цените по нивниот пад на петмесечното најниско ниво, еден делегат претходно изјави дека е прерано OПЕК+ да ја процени целосната пазарна импликација од мерките.

Во меѓувреме, саудискиот престолонаследник Мохамед бин Салман подоцна овој месец ќе отпатува во Вашингтон за да се сретне со претседателот Доналд Трамп, кој повеќепати ја повика OПЕК да помогне во намалување на цените на горивото.

Фјучерсите за нафтата Брент се намалени за околу 13 отсто оваа година, и во петокот се стабилизираа под 65 долари за барел. Освен санкциите кон Русија, цените добија поддршка и од едногодишното примирје во трговските тарифи постигнато минатата недела меѓу Вашингтон и Пекинг.

Реалните зголемувања на производството од страна на OПЕК+ значително заостануваат зад најавените количини, бидејќи некои членки ги компензираат претходните прекумерни количини, а други се борат да произведат повеќе, што го ограничува влијанието врз пазарот.

OПЕК+ повеќепати изјави дека одлуката за враќање на производството оваа година — и покрај предупредувањата за пад на цените — е водена од „здрави пазарни основи“ и ниски нивоа на залихи. Отпорноста на цените во текот на годината, иако групата врати 2,2 милиони барели една година порано, делумно ја потврди нивната позиција.

Сепак, се повеќе има знаци дека, со слабеење на побарувачката во најголемиот потрошувач Кина и раст на понудата во Америка, светскиот пазар се движи кон прекумерна понуда. Водечки трговски компании како „Трафигура“велат дека вишокот веќе пристигнал, укажувајќи на акумулација на барели во светската флота на танкери.

Меѓународната агенција за енергија во Париз предвидува дека светската понуда може да ја надмине побарувачката во овој квартал за повеќе од 3 милиони барели дневно, а потоа да се прошири во невиден вишок следната година, барем на хартија. „ЏП Морган“ и „Голдман“ предвидуваат понатамошен пад на цените под 60 долари за барел.

Целата алијанса ОПЕК+ од 22 земји треба да се состане на 30 ноември за да ги разгледа нивоата на производство за 2026 година.