Нафтата е пред голем неделен раст на цената поради санкциите за Русија

Нафтата е на пат да постигне најголем неделен раст од јуни откако американските санкции врз големите руски производители го потресоа пазарот, зголемувајќи ја можноста за прекини во снабдувањето и поголема побарувачка за алтернативни сорти.

Нафтата брент денеска се тргува близу 66 долари за барел, што е неделно зголемување од околу седум отсто, а нафтата ВТИ е под 62 долара. Рускиот проток на сурова нафта кон клучниот купувач Индија се очекува да се намали по казните врз „Роснефт“ (Rosneft PJSC) и „Лукоил“ (Lukoil PJSC), додека некои кинески државни рафинерии го прекинаа купувањето.

Мерките на САД доаѓаат во време кога глобалната понуда расте, а Русија има големо искуство во избегнување на санкциите - кои беа спроведени поради војната во Украина. Кувајтскиот министер за нафта рече дека ОПЕК (Организацијата на земји извознички на нафта) е подготвена да го зголеми производството доколку има поголема побарувачка и предупреди на повисоки цени на нафтата.

Кинеските големи компании го проценуваат влијанието на американските санкции, а некои престанаа со спот купувања на руска сурова нафта, според луѓе запознаени со ова прашање. Американскиот претседател Доналд Трамп планира за време на состанокот следната недела да разговара со својот колега Шји Џјинпинг за трговијата со нафта меѓу Кина и Русија.

„Клучно во наредните недели ќе биде што ќе се случи со податоците за активностите на бродскиот превоз и, ако има знаци на ненадеен застој или нагло забавување на рускиот извоз, сигурно можеме да видиме уште еден пораст“, рече Роберт Рени, раководител за истражување стоки и јаглерод во „Вестпек бенкинг“ (Westpac Banking Corp).

Русија очекува удар врз својот буџет, но земјата ќе ја распореди својата мрежа на трговци и танкери во сенка за да го ограничи финансиското влијание, според функционер близок до Кремљ. „Роснефт“, предводен од блискиот сојузник на рускиот претседател Владимир Путин, Игор Сечин, и „Лукоил“ се двата најголеми производители во земјата.

Bloomberg

 

Европската Унија исто така изврши дополнителен притисок врз Кремљ со нов пакет санкции насочени кон енергетската инфраструктура на земјата, додека Русија се соочува со редовни украински напади врз нејзините рафинерии, цевководи за сурова нафта и терминали за извоз. Вчера Киев презеде одговорност за нападот врз фабриката на „Роснефт“.

Трамп ги одложи казните за Русија, но недостигот од напредок во врска со мирот во Украина означи драматичен пресврт. Тоа е радикална промена на западната политика, која претходно се обидуваше да ги ограничи приходите за Кремљ преку ограничување на цените за да се спречи големо нарушување на снабдувањето и скок на цените.