Златото и бакарот го предводат растот на металите, доларот слабее: Преглед на пазарите

Рекордниот раст на суровините доби нов замав, откако златото, бакарот и среброто достигнаа историски рекорди, поттикнати од послабиот долар и зголемените геополитички тензии.

Златото поскапе за 2,5 отсто, на 5.555 долари за унца, со што месечниот раст се искачи на околу 28 отсто. Среброто го продолжи годинашниот пораст на 65 отсто, откако во 2025 година скокна за 148 отсто. Бакарот порасна за 5 отсто на Лондонската берза за метали, а нафтата „брент“ се искачи на највисоко ниво од септември. Сите овие средства се котирани во долари, па имаа корист од слабеењето на американската валута.

Американските државни обврзници паднаа поради загриженоста дека растечките цени на суровините ќе ја поттикнат инфлацијата. Дополнително, пазарите се вознемирија откако американскиот претседател Доналд Трамп го предупреди Иран да постигне нуклеарен договор со САД или да се соочи со воени напади многу полоши од оној што тој го нареди минатиот јуни.

Азиските акции благо пораснаа, заедно со фјучерсите на берзанските индекси во САД и Европа, по објавените резултати на големите технолошки компании како „Тесла“ (Tesla Inc.), „Мајкрософт“ (Microsoft Corp.) и „Мета“ (Meta Platforms Inc.).

Bloomberg

„Глобалните пазари се движат со јасен недостиг од убедување“, изјави Хебе Чен, аналитичар во „Вантаџ маркетс“ (Vantage Markets). „Растечките геополитички тензии околу Иран и нестабилниот американски долар придонесуваат за чувството дека макроризиците остануваат нерешени, држејќи ги инвеститорите во внимателен режим на чекање и набљудување.“

Со оглед на тоа што резултатите на технолошките компании испраќаат мешани сигнали, а контролата врз трошоците за вештачка интелигенција се засилува, пазарите повеќе се насочуваат кон селективно позиционирање отколку кон смело преземање ризик, сѐ додека не се појават појасни сигнали. Нестабилноста на пазарите на обврзници и валути се зголемува како што расте неизвесноста, поттикната од заканите на Трамп кон европските сојузници во врска со Гренланд и заострените напади на неговата администрација врз независноста на Федералните резерви.

Сите овие фактори на ризик ја зголемија побарувачката за безбедни средства, како што е златото.

Што велат стратезите на „Блумберг“ (Bloomberg):

Растот на златото од речиси 30 отсто овој месец и впечатливиот скок на среброто од повеќе од 60 отсто ги приближија двата благородни метала до еден од најголемите растови во историјата. Незапирливиот замав ги тера трговците да бидат загрижени дека овие наизглед неодржливи нагорни движења може да завршат со многу грди и долготрајни пресврти.

- Гарфилд Рејнолдс, лидер на тимот на МЛИВ (MLIV) 

Индексот Bloomberg Dollar Spot се намали за 0,3 отсто, повлекувајќи дел од добивките остварени откако американскиот министер за финансии Скот Бесент изјави дека САД не интервенирале за да го поддржат јенот и повтори дека водат политика на силен долар. Индексот падна по седми пат во девет сесии, што го носи кон најлошиот месец од април.

Мешаните резултати на технолошките гиганти и подобрата од очекуваната добивка на „Самсунг електроникс“ (Samsung Electronics Co.) не успеаја да ги раздвижат технолошките акции. Додека „Тесла“ порасна за 1,9 отсто, а „Мета“ скокна за 6,6 отсто во тргувањето по затворањето, „Мајкрософт“ падна за 6 отсто.

Распродажбата на индонезиските акции, пак, продолжи и втор ден по ред, предизвикувајќи привремен прекин на тргувањето, додека инвеститорите останаа претпазливи поради можните ризици од намалување на кредитниот рејтинг и загриженоста за транспарентноста на која укажа МСЦИ (MSCI Inc.).

„Неизвесностите може да доведат до уште поголеми разлики меѓу акциите глобално и меѓу секторите“, изјави стратегот на „Блумберг интелиџенс“ (Bloomberg Intelligence), Марвин Чен. „За Азија, притисокот врз доларот може да поттикне повеќе приливи во регионалните пазари. Инвеститорите ќе мора да бидат поселективни во распределбата по пазари и сектори.“

Во врска со Иран, Трамп изјави дека флотата на американски бродови што ја наредил во регионот, предводена од носачот на авиони „УСС Абрахам Линколн“ (USS Abraham Lincoln), е „подготвена, расположена и способна брзо да ја исполни својата мисија, со брзина и насилство, ако биде потребно“.

Трамп постојано го предупредува Иран дека САД би можеле да извршат нов напад, но тие закани во последно време се поврзуваат со смртоносното задушување на протестите во Иран, а не со неговите нуклеарни активности. Американскиот лидер претходно изјави дека иранската нуклеарна програма била „уништенa“ во нападите минатиот јуни, кога беа погодени три објекти низ земјата.

„Загриженоста расте, но средината укажува на внимателна претпазливост, а не на целосно повлекување“, изјави Франсис Тан, главен стратег за Азија во „Индосуец“ (Indosuez Wealth) во Сингапур. „Нејасниот сигнал околу намалувањето на каматните стапки ги држи пазарите во неизвесност.“

Корпорациски вести: 

„Енвидија“ (Nvidia Corp.), „Мајкрософт“ и „Амазон“ (Amazon.com Inc.) разговараат за инвестиција до 60 билиони долари во „Опен еј-ај“ (OpenAI), објави „Информејшн“ (The Information).

САП (SAP SE) прогнозираше дека приходите од облачни услуги ќе пораснат во 2026 година, бидејќи клиентите се префрлаат од постара технологија.

Трошоците на „Мајкрософт“ достигнаа рекордно високо ниво, а растот на продажбата на облачни услуги забави.

Силниот бизнис со рекламирање на „Мета“, кој ги поттикна очекувањата за тековниот квартал над процените, ѝ овозможува на компанијата годинава да инвестира на рекордни нивоа во вештачка интелигенција.

Секторот за чипови на „Самсунг“ (Samsung) ги надмина очекувањата со повеќе од петкратно зголемување на добивката во кварталот во декември.

„Тесла“ откри планови да инвестира 2 билиона долари во компанијата за вештачка интелигенција „Екс еј-ај“ (xAI) на главниот извршен директор Илон Маск, додека истовремено пријави повисока добивка од очекуваното за четвртиот квартал.

Акциите на кинеските компании од секторот недвижности пораснаа по извештај во локалните медиуми дека регулаторот повеќе не бара од инвеститорите да доставуваат клучен сет показатели наменети за ограничување на нивното задолжување.

„Тојота мотор“ (Toyota Motor Corp.) ја задржа титулата најголем производител на автомобили во светот шеста година по ред, зголемувајќи ја предноста пред „Фолксваген“ (Volkswagen AG).

Добивката на „Хјундаи“ (Hyundai Motor Co.) не ги исполни процените, бидејќи производителот се соочува со постојан притисок од американските царини и забавувањето на транзицијата кон електрични возила на некои пазари.

Акции

• Фјучерсите на индексот S&P 500 беа речиси непроменети заклучно со 14:15 часот по токиско време
• Јапонскиот Topix порасна за 0,1 отсто
• Австралискиот индекс S&P/ASX 200 беше речиси непроменет
• Хонгконшкиот Hang Seng порасна за 0,3 отсто
• Shanghai Composite беше речиси непроменет
• Фјучерсите на Euro Stoxx 50 пораснаа за 0,2 отсто

Валути

• Индексот Bloomberg Dollar Spot падна за 0,3 отсто
• Еврото порасна за 0,3 отсто, на 1,1987 долари
• Јапонскиот јен зајакна за 0,3 отсто, на 152,98 јени за долар
• Офшор јуанот беше речиси непроменет, на 6,9421 за долар

Криптовалути

• Биткоинот падна за 1,2 отсто, на 88.182,17 долари
• Етерот падна за 2 отсто, на 2.956,52 долари

Обврзници

• Приносот на 10-годишните американски државни обврзници порасна за два базични поена, на 4,27 отсто
• Јапонскиот 10-годишен принос беше речиси непроменет, на 2,240 отсто
• Австралискиот 10-годишен принос порасна за два базични поена, на 4,83 отсто

Суровини

• Нафтата „вест тексас“ (West Texas Intermediate) порасна за 1,5 отсто, на 64,18 долари за барел
• Спот цената на златото порасна за 2,6 отсто, на 5.558,59 долари за унца