Златото над 5.000 долари по податоците од САД што го поддржаа намалувањето на каматите

Златото порасна умерено, консолидирајќи ги добивките над 5.000 долари за унца, откако слабите податоци за малопродажбата во САД ги зајакнаа очекувањата дека Федералните резерви ќе ги намалат каматните стапки.

Благородниот метал порасна до 0,9 отсто, откако во вторникот затвори со пад. Потрошувачката неочекувано стагнираше во декември, што го зголеми вниманието за одложениот и внимателно следен јануарски извештај за вработеноста, кој треба да биде објавен денеска. Приносите на американските десетгодишни обврзници паднаа на најниско ниво за речиси еден месец, додека доларот ослабе четврти ден по ред, што го направи златото поевтино за многу купувачи.

Златото се стабилизира околу 5.000 долари

Благородниот метал надомести околу половина од загубите по наглиот пад

Bloomberg

Падот на приносите помогна да се подигнат цените на златото, изјави Манав Моди, аналитичар во „Мотилал“ (Motilal Oswal Financial Services Ltd.) со седиште во Мумбај.

Благородниот метал не носи камата и вообичаено расте кога приносите на други места стануваат помалку привлечни.

Златото кон крајот на јануари скокна на рекордно ниво над 5.595 долари за унца, поттикнато од геополитички превирања, напади врз независноста на Фед и оддалечување од традиционалните средства како валутите и државните обврзници. Но бран на шпекулативни купувања доведе до прегревање на растот, по што златото потона за околу 13 отсто во две сесии.

Оттогаш надомести околу половина од тие загуби и оваа недела се тргува околу 5.000 долари за унца. Многу банки очекуваат растот да продолжи, бидејќи причините што ги поткрепија добивките и натаму се присутни.

„БНП Париба“ (BNP Paribas SA) смета дека цената може да достигне 6.000 долари до крајот на годината, додека „Дојче банк“ (Deutsche Bank AG) и „Голдман Сакс груп“ (Goldman Sachs Group Inc.) исто така имаат позитивни прогнози.

„Голем дел од шпекулативното позиционирање очигледно е исчистен, што го намалува ризикот од екстремни осцилации на краток рок“, изјави Ахмад Асири, аналитичар во „Пеперстоун груп“ (Pepperstone Group Ltd.). Намалената волатилност, според него, може да биде „основа за следниот раст“.

Секое дополнително намалување на трошоците за задолжување во САД би било позитивно за златото, а изборот на американскиот претседател Доналд Трамп за претседател на Федералните резерви, Кевин Ворш, се залага за понатамошни намалувања на каматите. Сепак, претседателката на Фед на Кливленд, Бет Хамак, во вторникот изјави дека каматните стапки би можеле да останат на исто ниво подолг период, додека претставниците ги оценуваат пристигнатите податоци.

Спот-златото порасна за 0,5 отсто, на 5.052,17 долари за унца, заклучно со 15:50 часот во Сингапур. Среброто скокна за 3,4 отсто, на 83,5555 долари за унца, додека платината и паладиумот пораснаа за повеќе од 2 отсто. Индексот Bloomberg Dollar Spot, мерка за американската валута, падна за 0,3 отсто и е во минус од 1,3 отсто во последните четири сесии.