Г7 бара од МАЕ сценарија за пуштање итни резерви на нафта

Земјите од Групата 7 (Г7) побараа од својата главна енергетска агенција - Меѓународна агенција за енергија, (International Energy Agency – IEA) да подготви сценарија за пуштање на итните нафтени резерви, додека кризата на Блискиот Исток ги потресува пазарите.

Г7 сака да биде подготвена, доколку биде потребно, да ги активира нафтените резерви, па  МАЕ е задолжена да анализира колкави количини би можеле да бидат пуштени на пазарот, изјави во вторникот во Париз францускиот министер за финансии Ролан Лескур пред новинарите. Франција во моментов претседава со групата.

МАЕ, која го надгледува користењето на нафтените резерви на земјите од ОЕЦД, ќе разговара за тој процес на седница на одборот подоцна во текот на денот.

Цените на нафтата во понеделникот во Лондон скокнаа на четиригодишен максимум од речиси 120 долари за барел, откако протокот низ клучниот Ормусски теснец во Персискиот Залив практично беше запрен, додека големите производители на Блискиот Исток го намалија производството. Фјучерсите потоа се коригираа надолу откако претседателот на САД, Доналд Трамп изјави дека војната би можела да заврши „многу брзо“, па во вторникот со нафта се тргуваше околу 91 долар за барел.

Владите на земјите членки на МАЕ „ќе ја проценат моменталната безбедност на снабдувањето и условите на пазарот за да одлучат дали итните резерви на земјите на МАЕ ќе бидат ставени на располагање“, изјави извршниот директор на агенцијата Фатих Бирол во соопштение по состанокот на министрите на Г7.

„Условите на нафтениот пазар се влошија во последните денови“, рече тој, наведувајќи го речиси целосното запирање на транзитот низ Ормускиот теснец и намалувањето на производството на нафта во регионот.

Саудиска Арабија, Обединетите Арапски Емирати и Ирак се меѓу производителите кои дополнително го продлабочуваат намалувањето на испораките на нафта, со што глобалното производство е намалено за околу 6 отсто, додека складишните капацитети во регионот се полнат. Обединетите Арапски Емирати во вторникот, од претпазливост, го суспендираа и работењето во својата најголема рафинерија „Руваис“, по напад со дрон во тој регион.

МАЕ соопшти дека 32 земји членки располагаат со повеќе од 1,2 милијарди барели итни резерви, вклучително и најголемата – Стратешката нафтена резерва на САД.

Земјите на МАЕ дополнително имаат околу 600 милиони барели резерви кои се должни да ги одржуваат согласно државните прописи.