Додека повеќето македонски банки буквално не знаат што да прават со вишокот ликвидност која ја црпат главно од штедните влогови на македонските граѓани, Владата се уште калкулира со издавањето на граѓанската обврзница. Со неа, прв пат во Македонија, државата би требало да создаде нова конкуренција на банкарскиот сектор. Банките засега може мирно да спијат со оглед на тоа што премиерот Димитар Ковачевски вчера соопшти дека не се знае точниот тајминг на издавањето на обврзницата и дека Министерството за финансии во дослух со Народната банка се уште анализира за висината, рочноста и каматата по која ќе се издава обврзницата.
Добро утро, подолу вестите што ги одвоивме за почеток на денот.
Банките распродаваат живеалишта: Луксуз и багатела на едно место
Неколку стотици семејни куќи и станови кои биле предмет на заплена по основ на ненеплатени кредити нудат на продажба во моментов македонските банки. Нашата анализа на огласите за продажба на имот на банките покажа дека речиси и да нема град во Македонија каде што банките не заплениле станбен недвижен имот или пак тој е предмет на присилна наплата.
На продажба се нудат куќи вредни и повеќе од 500.000 евра, но има и трошни имоти од кои банките очигледно не можат да се „отарасат“. Огласите откриваат и драстични разлики во цените на квадрат станбена површина кои освен од состојбата на живеалиштата главно зависат од местоположбата односно градот во кој се наоѓаат.
Цените на градежните материјали се стабилизираа – ќе се стабилизира ли и градежништвото?
Ќе се врати ли градежништвото на високите стапки на раст кои ги имаше до пред неколку години? Статистиката покажува дека последните две години биле исклучително лоши за секторот кој е двигател на економскиот раст и кој влече уште дваесетина други гранки.
Блумберг Адрија
Градежништвото последен пат било во „плус“ во 2019 година кога забележа раст од 5,5 отсто. Од тогаш почна надолниот тренд кој лани стигна до -8,4. Како главни причини за кризата во секторот беа наведувани скапите енергенти, скапите градежни материјали, недостигот од работници, високите трошоци за работната сила и лошата реализација на капиталните инвестиции кои државата ги планира.
Доха и Дубаи се најконкурентните пазари на труд
Доколку барате нова работа, со најголема конкуренција ќе се соочите на Блискиот Исток и во технолошките центри во Калифорнија. Доха, Дубаи и Сан Франциско се меѓу градовите кои имаат најголем број апликанти по објавено работно место на „Линкдин“ (LinkedIn) во февруари, според студијата на онлајн креаторот на СВ-а, „Резиме“ (Resume.io). За да го создаде своето рангирање, компанијата следела 130 глобални центри и секоја сојузна американска држава и набљудувала колку апликации биле поднесени за позиции во првата недела откако биле огласени.
Bloomberg
Доминацијата на Катар на листата веројатно е поврзана со организацијата на Светското првенство минатата година. Од 2010 година, земјата потроши повеќе од 250 милијарди долари како дел од подготовките, меѓудругото, изградба на речиси 100 нови хотели, проширување на пристаништето и аеродромот и реновирање на патишта.
Сè што треба да знаете за чипот што предизвика бум на вештачката интелигенција
Ретко се случува компјутерската компонента да предизвика бранувања надвор од технолошката индустрија. Но, кога „Енвидија“ (Nvidia Corp.) во мај објави експлозивна прогноза за продажбите, која ја одведе нејзината пазарна вредност над билион долари, ѕвезда на шоуто беше најновата компонента за графичка обработка, Х100 (H100).
Новиот чип им покажува на инвеститорите дека вревата околу генеративната вештачка интелигенција - системи што можат да извршуваат широк опсег на задачи со супермоќна брзина - се претвора во реален приход, барем за „Енвидија“. Побарувачката за Х100 е толку голема што некои клиенти треба да чекаат дури шест месеци за да го добијат. Х100, чие име е во чест на пионерот на компјутерската наука Грејс Хопер, е графички процесор. Тоа е тип на чип што вообичаено се вградува во компјутерите и им овозможува на гејмерите да добијат најреално визуелно искуство.
Целосната забрана на пластични ќеси одложена за следната година
Одлуката за целосна забрана за употреба на пластични и оксобиоразградливи ќеси на пазарите во земјава ќе стапи во сила во 2024 година, а не на 1 јули годинава, информираат од Министерството за животна средина (МЖСПП).
„Во согласност со правилникот за изменување на правилникот за стандардите за биоразградливост што треба да ги исполнуваат ќесите за носење стоки, начинот на пуштање на пазар на биоразградливи ќеси од страна на трговците, како и формата и содржината на образецот за водење евиденција, направена е измена во членот 6 во ставот 1, и зборовите ’1 јуни 2023 година’ се заменуваат со зборовите ’1 јуни 2024 година’“. Оттука, забраната за употреба на ќеси што не ги задоволуваат стандардите пропишани со овој правилник целосно ќе биде имплементирана од 1 јуни 2024 година“, посочуваат од МЖСПП.
.webp){kind=icon}
