text size
Управувањето со огромни суми пари, пред сè, се сведува на нивно распределување низ различни средства за да се избегнат концентрирани ризици. Но длабочината и широчината на револуцијата со вештачката интелигенција ја претворија во илузија вообичаената диверзификација на која тие се потпираат.
Пензиските фондови во развиените економии, па и од пазарите во развој како македонскиот, инвестираат во сè - од акции на берзата, преку приватен капитал и корпоративен долг, до инфраструктура и друго. Во сегашната ера сето тоа се претвора во ризик поврзан со вештачката интелигенција.
Добро утро, ви пишува Игор Петровски од дигиталната редакција на Блумберг Адрија, ова се пет вести за почеток на денот.
Градежништвото ќе расте - македонските градежни компании не се целосно искористени
Зголемен обем на работа и помалку работници. Македонското градежништво се наоѓа во контрадикторна состојба. Податоците за вториот квартал покажаа засилен раст на секторот - 21,9 отсто поголем од истиот период лани. Наедно ова е и највисок раст од крајот на 2024 година досега. Паралелно, бројот на работници во градежништвото се намалува од квартал до квартал. Над 400 работни места се изгубени во последните три месеци, а од крајот на 2024 година до средината на оваа година бројот на работни места се намалил за повеќе од 1.800 лица.
Секој поголем инфраструктурен проект што во изминатиот период го реализира странска компанија вклучува и домашни компании – било како даватели на услуги, проектанти, консултанти или подизведувачи. Проблемот е што во изминатиот период тоа учество често беше симболично или ограничено на помали сегменти од проектот. На тој начин домашните компании не добиваа доволно простор да ги искористат своите капацитети.
Проблеми со станбените кредити? Пребарувањата за ова се на највисоко ниво во историјата
Пребарувањата поврзани со помош при станбен кредит достигнаа највисока бројка во петтиот месец од оваа година. Каматните стапки во Европа и во САД значително пораснаа во период од две години. Тоа имаше задоцнето влијание врз вкупните трошоци за финансирање недвижности.
Покрај зголемувањето на каматните стапки, цените на недвижностите продолжија да растат, па на крајот се зголеми бројот на луѓе за кои финансирањето на станбените кредити се покажа како проблематично.
„Парамаунт“ се спогоди - конечно може да го преземе „Ворнер Брос“ за 110 милијарди долари
„Парамаунт“ (Paramount Skydance Corp.) постигна спогодба во врска со тужбите поднесени од јавните обвинители на 12 американски сојузни држави и синдикатот на филмските работници „Writers Guild“; овој потег ќе ѝ овозможи на компанијата да ја финализира историската аквизиција на „Ворнер Брос“ (Warner Bros. Discovery Inc.) вредна 110 милијарди долари.
Засегнатите страни работеа и за време на викендот за да го постигнат договорот, кој вклучува заштитни мерки наменети за ограничување на пазарната моќ и обезбедување на уредувачката независност на медиумскиот гигант. Оваа компанија ќе управува со две од најголемите холивудски студија, два големи стриминг-сервиси со претплата и десетици ТВ-канали, од „Си-би-ес“ (CBS) до „Ејџ-би-о“ (HBO).
Банката на Англија загрижена дека ВИ може да ги урне берзите
Според вицегувернерката на Банката на Англија, Сара Бриден, на финансиските регулатори им истекува времето за справување со ризикот автономните агенти со вештачка интелигенција (ВИ) да предизвикаат колапс на пазарите.
Таа во понеделникот изјави дека централната банка на Обединетото Кралство размислува за тестирање на „прекинувачи за итно исклучување“ (kill switches) за да спречи ВИ да предизвика хаос на финансиските пазари, иако нагласи дека официјалните лица сè уште не знаат како би функционирал таков систем.
„АМД“ на чекор до вредност од еден билион долари, поради бумот на ВИ
Акциите на „АМД“ (Advanced Micro Devices Inc.) пораснаа во понеделникот, со што компанијата е на пат за првпат да достигне пазарна вредност од над еден билион (илјада милијарди, н.з.) долари, поттикната од обновениот оптимизам околу производителите на чипови неопходни за развојот на вештачката интелигенција (ВИ).
Вредноста на акциите се зголеми за дури 10 отсто, достигнувајќи рекордно ниво, и компанијата е на пат да им се придружи на другите производители на чипови, како „Мајкрон“ (Micron Technology Inc.), „Броудком“ (Broadcom Inc.), „ТСМЦ“ (Taiwan Semiconductor Manufacturing Company Ltd.) и „Енвидија“ (Nvidia Corp.), кои имаат пазарна вредност од 1 билион долари или повеќе.
.webp){kind=icon}
