.webp){kind=icon}
Во Министерството за финансии во тек се анализите за издавање на граѓанската обврзница и штом ќе завршат ќе биде објавена и одлуката за нејзино издавање, изјави денеска премиерот Димитар Ковачевски.
Според Ковачевски, веќе има голем интерес кај граѓаните, на кои со овој инструмент им се дава можност да инвестираат во развојни проекти на државата и притоа да имаат загарантирана каматна стапка, која верува дека ќе биде поголема од пасивните банкарски камати за депозити.
„За точниот тајминг на издавањето на обврзницата, за нејзината висина, како и за нејзината рочност и каматна стапка ќе мора да завршат сите анализи што се прават во Министерството за финансии, разговорите што се водат и со монетарната власт, односно со Народната банка, бидејќи сепак и тие имаат големо значење во креирањето на економските политики да бидат консултирани и штом тоа ќе го има министерот за финансии, тогаш и граѓанската обврзница ќе биде издадена. Меѓутоа, можам да пренесам само задоволство од голем број граѓани што ми пришле и кои велат дека конечно државата ќе издаде граѓанска обврзница што ќе им даде уште една можност на граѓаните да можат да ги пласираат своите финансиски средства што ги имаат слободни“, рече Ковачевски на новинарско прашање дали е определен точниот датум кога ќе профункционира граѓанската обврзница, на настан во Свети Николе.
