Народната банка го следеше примерот на Европската централна банка и навестувањата за одлуката на Федералните резерви на САД (поради временската разлика одлуката беше соопштена подоцна истиот ден) и одлучи да направи пауза. Немаше петнаесетто по ред зголемување на каматата на благајничките записи, таа остана на нивото од 6,30 отсто.
Одлуката на НБРМ беше сосема очекувана, но соопштението на централната банка многу експлицитно кажува дека е рано за опуштање и дека ова сега е само пауза во затегнувањето на монетарната политика. Централната банка забележува дека „вкупната инфлација забавува малку послабо од очекувањата според последните проекции, а нејзиното ниво сѐ уште е над историскиот просек“.
НБРМ исто така констатира дека забавувањето на економијата во вториот квартал е во рамките на проекциите, но дека податоците за третиот квартал засега упатуваат на послаб економски раст во овој квартал во однос на априлските очекувања. Исто така најновите очекувања упатуваат на надолна ревизија на растот на странската побарувачка до крајот на 2024 година, со изгледи и за побавно закрепнување на домашната економија во следниот период.
На сето тоа се додаваат и ризиците од војната на Блискиот Исток, енергетските предизвици во пресрет на зимата, особено цената на гасот за домашното стопанство по одлуката на Бугарија да воведе транзитна такса.
Во меѓувреме, компаниите ги објавуваат извештаите за третиот квартал. Енергетските компании покажуваат полоши резултати од лани, на производителите на лекови и деловните банки им оди многу подобро.
Лани добро им одело на поединци што заработиле милиони од дивиденди и плати. УЈП го објави списокот на тие што платиле најмногу персонален данок, но и се закани дека ќе блокира третина од најуспешните фирми во државата затоа што уште не платиле солидарен данок.
Неделава во земјава престојуваше претседателката на Европската комисија, Урсула фон дер Лајен, која ни порача да ги забрзаме реформите за влез во ЕУ, да го искористиме отворениот прозорец со можности - за да не нѐ фати провев.
.webp){kind=icon}
