Владините антиинфлаторни мерки, како замрзнатите цени до крајот на годината, вештачки држат ценовна стабилност и на долг рок ќе имаат негативни ефекти, вели во интервју за „Блумберг Адрија“ Миле Бошков од Бизнис-конфедерацијата на Македонија.
Бошков вели дека мешањето на државата на слободниот пазар може да резултира и со отпуштање вработени.
„На компаниите и на трговците што се во широката потрошувачка им е важно да знаат како ќе функционираат понатаму. Овие непредвидени акции, така да ги наречам, навистина влијаат негативно врз работата на компаниите и слободната пазарна економија од секој аспект ги диктира цените. Континуитетот на ваква политика може да роди друг негативен ефект, а тоа е отпуштање работници во компаниите што се занимаваат со трговија на производи за широка потрошувачка. Ова не е закана, туку порака од економска логика, така што државата треба да овозможи поволна бизнис-клима во секој поглед, особено кога станува збор за слободната пазарна економија, и понатаму да се движиме во насока на зајакнување на стандардот на граѓаните и зголемување на капацитетот на потрошувачите“, вели Бошков.
Прочитај повеќе
Солидарен данок не платиле третина од фирмите, ќе бидат блокирани
Доколку во меѓувреме не ја исполнат обврската, на 24 ноември ќе им биде блокирана сметката.
31.10.2023
Данокот на солидарност оспорен пред Уставен суд
Целта на иницијативата, како што соопшти комората е заштита интересите на членките.
13.10.2023
Тој потенцира дека дополнителен притисок е досегашниот континуиран раст на каматните стапки и дека монетарното затегнување ќе ја задуши и онака кревката македонска економија.
„Каматните стапки воопшто не се пригодни во моментов за компаниите, не е важно дали станува збор за инвестициски кредити, може да е тоа потреба од финансиска ликвидност итн. На ова ниво на кое се каматите се нарушува пазарната и оперативната стабилност на компаниите“, вели претседателот на Бизнис-конфедерацијата на синдикати.
Бошков го критикува и начинот на кој беше донесен данокот на солидарност, кој, според него, предизвика револт и ја наруши довербата кај бизнис-секторот.
„Владата можеби добро предвидела да наплати пари врз основа на поголеми профити, но ние мора да покажеме регулаторна правна рамка и стабилност што ќе се менува исклучиво низ дијалог. Она што боли е начинот на комуникација. Оние компании што можеби досега биле општествено одговорни итн., сега се разочарани и можеби не може да ја исполнат мисијата да инвестираат и донираат бидејќи мора да ја исполнат последната законска регулатива“, потенцира Бошков.