.webp){kind=icon}
Стопанството е во неизвесност и страв по одлуката на Бугарија за воведување такса за рускиот гас што транзитира на нејзината територија.
Сериозноста од последиците од ваквата одлука, која може да резултира со ценовен шок кај гасот во Македонија, била истакната и на средбите на Стопанската комора со Бугарската трговско-индустриска комора.
„На средбата се разговараше и на таа тема, која е една од поважните за стопанството. Во случај кога оваа одлука сè уште не е во сила, бидејќи е оспорена од претседателот на Бугарија, се зборуваше за мерките и чекорите што може да се преземат за да се минимизира ова влијание што би го имала таксата за да се заштити стопанството. Стопанската комора на РСМ и Трговско-индустриската комора на Бугарија се отворени за соработка за да се најде решение, но во моментов состојбата е статус кво“, вели Кристина Кузеска од Стопанската комора.
Кузеска потенцира дека последиците за бизнис-секторот ќе бидат огромни, со оглед на тоа што поскапувањето може да стигне до над 25 отсто, а секое нарушување на цените на енергентите ќе влијае врз конкурентноста на нашите компании.
Блумберг Адрија
Особено се засегнати компаниите на кои целото производство им зависи од гасот, а кои се затекнати од ваквата одлука.
„Компаниите од технолошко-индустриските развојни зони имаат линии што целосно зависат и се снабдуваат со гас, таква е на пример компанијата ’Џонсон Мети’. Е, сега, што ќе се случи со тие компании, кои целиот производствен процес го планирале на гас, но не биле известени за оваа нова давачка, која сега се воведе, а не беше најавена? Компаниите што се приклучени на тој гасовод се снабдуваат со тој гас, а ако се затвори тој вентил, прашање е дали тие во својата инсталација имаат можност да користат течен гас, но и дали воопшто има доволно количества за тој гас и која е цената. Значи просторот за маневар е многу мал“, вели таа.
Кузеска посочува дека оваа давачка влијае и на Србија и на Унгарија, но не како на Македонија, бидејќи Македонија има само една интерконекциска врска со Бугарија, тоа е гасоводот што е закупен од „Газпром“.
„Минатата година беа ослободени некои капацитети, прашање е дали може да се ослободат дополнителни капацитети. Сега тука има некој простор да се провери како е дефинирана цената на гасот и врз кого би паѓал тој трошок за такса, на пример дали ќе биде кај трговците, потрошувачите, дали можеби ќе биде покриено од државата, значи многу е важно трговците да проверат во своите договори како е формирана односно во која точка е формирана цената на предавање на гасот. Доколку гасот се купува од Русија преку бугарски трговци, тука секако влијае таа такса. Доколку таа такса некако е можеби сместена на начин што точката на примопредавање на гасот, односно цената на таа точка е дефинирана да биде пренесена на другата страна, можеби некако се избегнува тој трошок, но треба да се провери каде е тој случај, бидејќи компаниите не беа подготвени да се заштитат и воопшто не знаеја дека ќе имаат таква давачка. Третиот изолиран случај е доколку со гас се снабдуваме од други земји, како на пример од Азербејџан, но тоа се некои помали капацитети“, вели таа.
