.webp){kind=icon}
Жител на Скопје минатата година остварил и пријавил 446 милиони денари (7,25 милиони евра) годишен бруто доход.
Највисока годишна бруто плата во 2022 година исплатена е на граѓанин од Скопје во дејноста трговија на големо со производи од тутун и изнесува 144 милиони денари (2,3 милиони евра) или месечно по речиси 200.000 евра, покажуваат податоците што ги објави денеска директорката на Управата за јавни приходи, Сања Лукаревска.
Според статистиката, највисокото лично примање по основ на извршена работа го пријавил граѓанин од Скопје и изнесува 280,6 милиони денари (4,6 милиони евра) на годишно ниво, а доходот е остварен во странство. На врвот на листата за исплата на највисок доход од самостојно вршење дејност повторно се скопјани, а највисокиот износ е 61,9 милиони денари.
Во 10- топ рангирани на листата се наоѓаат адвокати, нотари, угостители, одгледувачи на жито и мешункасти растенија и од дејноста производство на амбалажи од хартија. Највисокиот доход од продажба на земјоделски производи е во износ од 18,9 милиони денари над 307 илјади евра), а ја остварил жител на Скопје.
Највисоката капитална добивка минатата година изнесува 173,4 милиони денари (2,8 милиони евра), а е остварена и пријавена од граѓанин на Скопје кој продал удел во трговско друштво чија дејност е производство на филмови, видео филмови и телевизиска програма.
Највисоката исплатена дивиденда е во износ од 229,6 милиони денари на граѓанин на Скопје, кој се јавува како сопственик на удел во компанија чија дејност е болници.
Најмладиот милионер кој остварил најголема добивка во денари има само девет години.
