.webp){kind=icon}
Неделава ја обележи средбата меѓу рускиот претседател Путин и севернокорејскиот лидер Ким, кои склучија договор сличен на тој од времето на Студената војна. Според договорот, меѓусебно ќе се бранат доколку бидат нападнати. Ким вети и безусловна поддршка за Русија во војната со Украина. Аналитичарите велат дека иако сето ова личи на шоу, не може да се знае што си ветиле двајцата лидери во четири очи и што ќе значи тоа во иднина.
Во Европа неделата поминува во знакот на колебањата на централните банки за идните чекори откако инфлацијата малку, но се зголеми во мај. По долгиот молк, Швајцарската банка ја намали каматата за да ја поддржи економијата, Банката на Англија одлучи да не тргне во тој правец, но во следниот период може да почне со намалување откако инфлацијата на Островот по три години се врати на целните два отсто. Франција и Италија имаат дополнителен проблем – буџетските дефицити поради кои добија укор, а може и да бидат казнети.
Во земјава викендов Собранието ќе ја гласа новата влада, што значи од понеделник новиот премиер и министрите ќе треба да почнат со работа. Меѓу најголемите проблеми е градежништвото, кое е во слободен пад, а порано беше двигател на економијата. Сега потрошувачката односно зголемените плати ја движат економијата.
Ќе се зголеми и цената на струјата од 1 јули, колкаво ќе биде зголемувањето сè уште не се знае, но трошоците за живот и натаму ќе растат и оттука не е чудо што Скопје станува скап град за живот на странските работници. Скапи се и естетските зафати, но тоа не ги спречува Македонците да се боцкаат и разубавуваат на други начини.
Земјата старее, одржувањето на стабилноста на државниот пензиски систем е вистински предизвик, но затоа пак тркалезната маса што ја организираше „Блумберг Адрија“ покажува дека приватните пензиски друштва имаат рецепт за социјална сигурност и повисок стандард на идните пензионери. Поголема сигурност имаат и лицата со приватно здравствено осигурување, за пет месеци наплатиле над 5 милиони евра за услуги во приватното здравство.
Анализиравме и како функционираат семејните фирми. Истражувањата покажуваат дека над 60 отсто од семејните бизниси во регионот сè уште се управувани од нивните основачи. Промената на управувачкиот кадар кај нив оди потешко, а генерацискиот јаз е поголем. Кај македонските банки, пак, овој трансфер оди мазно.
Пред нас е продолжен викенд во портокалова фаза. До недела температурите ќе се искачуваат до 40 степени, а ноќите ќе бидат тропски. Најважно е да се следат препораките – да се остане дома и да се пие многу вода.
