Цената на струјата за малите потрошувачи и домаќинствата може да се зголеми од 10 до 15 отсто, но во Регулаторната комисија за енергетика велат дека на располагање имаат механизми со кои нема да дозволат ценовен шок, иако тие само ја контролираат цената. Сега цената на струјата во ниската тарифа е 1,7522 денара за киловат, додека во високата тарифа, во зависност од блоковите, се движи од 4,2255 до 17,3242 денара за киловат. Новата цена треба да важи од први јули.
„Сè уште ги немаме податоците од универзалниот снабдувач, бидејќи пресметката сега ја прави универзалниот снабдувач, а ние само ја контролираме. Но, според некои процени, ако се прифати сè што е побарано, зголемувањето би било помеѓу 10 и 15 проценти“, вели Марко Бислимоски, претседател на РКЕ, во интервју за „Блумберг Адрија“.
Блумберг Адрија ТВ
Тој додава дека во изминатите четири години државата имаше турбулентен период, од ковид до енергетска криза, и сето тоа имаше големо влијание, но, според Бислимоски, и во многу полоши услови РКЕ не дозволила никакви ценовни шокови.
„И сега ќе направиме да нема никаков ценовен шок, особено за домаќинствата“, вели Бислимоски.
Тој појаснува дека на слободниот пазар на електрична енергија во Македонија има намалување на цената на електрична енергија пред сè поради тоа што цените во текот на денот се релативно ниски.
„Потрошувачите што се на слободниот пазар во изминативе шест месеци имаат од 60 до 70 отсто пониски трошоци за електрична енергија“, вели Бислимоски.
Состојбата е различна на регулираниот пазар, каде што универзалниот снабдувач „ЕВН хоум“ го распиша тендерот, кој треба да заврши в четврток. Бислимоски појаснува дека таму, според најавите, ЕСМ како најголема државна компанија ќе учествува со цена од 60 евра за мегават-час, според информациите објавени во медиумите.
„Значи, единствено се прави притисок на регулираниот пазар на електрична енергија, каде што најголем дел се снабдувани домаќинствата и помал процент на таканаречени мали потрошувачи што сè уште останале на регулираниот пазар на електрична енергија. И дополнително, ЕСМ сега на овој тендер ќе обезбеди само 85 отсто од потребите на домаќинствата и малите потрошувачи. Тоа се најголемите причини зошто се прави притисок врз цената на електричната енергија за домаќинствата“, вели Бислимоски.
Во однос на инвестициите во ОИЕ, Бислимоски очекува и натаму да расте интересот.
„Во првите шест месеци од 2024 година имаме 150 мегавати новоизградени фотоволтаици што се приклучени на мрежа. Интересот е голем и во наредниот период очекуваме да бидат приклучени и поголеми електроцентрали, кои се во завршна фаза на изградба“, вели Бислимоски.
Тој додава дека годинава очекува нови триста мегавати, а сето тоа влијае на потрошувачката на електрична енергија.
„Голем број компании си поставија фотоволтаици и со тоа драстично ја намалија својата потрошувачка, а има и сериозен тренд на пораст на домаќинствата што поставуваат фотоволтаици. Од овие причини во 2023 година имаме најниска потрошувачка на електрична енергија во последните десетина години. А следејќи ги трендовите што ги имаме, потрошувачката на електрична енергија ќе биде рекордно ниска пред сè поради големиот број фотоволтаици што се поставени од страна на компаниите“, вели Бислимоски.
Блумберг Адрија ТВ
Тој појаснува дека кај веќе изградените фотоволтаични електроцентрали, со направените законски измени за мрежните правила за дистрибуција, веќе може да поставуваат и батериски системи.
„Тој што има фотоволтаици може да постави батериски системи. И веќе започнуваат инвестиции во таа насока. Тоа значи дека ќе се зголеми пазарното портфолио што го имаат производителите на електрична енергија односно фотоволтаиците“, вели Бислимоски.
Тој додава дека очекува во периодот по 19 часот на берзите да има и намалување на цената на електричната енергија.
„Тоа веќе гледаме дека се случува во Калифорнија, каде што има интензивен пораст на поставените батерии“, вели Бислимоски.
Во однос на промената на власта, за соработката со идната влада од РКЕ велат дека во согласност со Законот за енергетика, каде што е инкорпориран третиот енергетски пакет, Регулаторната комисија за енергетика има јасна позиција, односно дека оваа институција била и ќе остане независна, без разлика на случувањата во политиката.
.webp){kind=icon}
Во моментов нема коментари за веста. Биди прв да коментира...