Колку ќе плаќаме за струја по Нова година?

Регулаторната комисија за енергетика утре ќе соопшти колку ќе чини струјата за домаќинствата и компаниите кои се снабдуваат на регулираниот пазар.

Цената што АД ЕСМ ја понуди на последниот тендер на ЕВН Хоум изнесува 62 евра за мегават час. Оваа цена е за две евра повисока од цената што во моментов државната компанија ја наплатува од ЕВН.

Според пресметките што ги прави Регулаторната комисија за енергетика, цената што ја нуди АД ЕСМ има најголемо влијание при формирањето на цената на струјата. Оттука, очекувањата се дека од 1 јануари ќе плаќаме поскапа струја.

Премиерот Христијан Мицкоски неколкупати досега во изјави за медиумите рече дека не очекува големи промени во цената на струјата, а доколку дојде до такво нешто, тогаш според него, зголемувањето би требало да биде минимално од еден до три проценти.

Последен пат цената на струјата се зголеми од 1 јули годинава. Тогаш, цената на електричната енергија за домаќинствата во првиот блок остана иста, во вториот блок се зголеми за 0,85 проценти, во третиот блок за 1,92 проценти и во четвртиот блок за 1,88 проценти. Цената на евтината струја се зголеми за 0,65 проценти.

Расте цената на струјата и за компаниите кои се снабдуваат на слободниот пазар. Во текот на минатиот месец на унгарската берза Хупекс цените надминуваа 500 евра за мегават час што потсетува на периодот од енергетската криза во 2022 година.

Главната причина за растот на цената на струјата е студеното време кое на зафати Европа.