Најголемата светска криптоберза Бајненс (Binance) најави привремен застој на своите услуги денеска, 25 септември, поради планирано одржување на системот. Оваа надградба, која ќе започне во 6.30 часот по координираното светско време (UTC), ќе трае околу три часа. За време на тој период корисниците би можеле да доживеат краткотрајни прекини во работата на клучните услуги.
Бајненс во својата официјална објава истакнува дека целта на ова одржување е подобрување на перформансите и стабилноста на платформата, која секојдневно услужува милиони корисници низ светот.
Добро утро, ова се петте важни вести што треба да ги прочитате на почетокот од денот.
Колку чини квадрат во Скопје: Стан во Центар или два во Чаир?
Цената на становите продолжува да расте, иако продажбата опаѓа веќе трета година по ред. Во вториот квартал од годинава се регистрирани 5.040 продажби, што е осум проценти помалку споредено со истиот период лани. Бројот на евидентирани закупи се намалил многу повеќе. Во периодот од април до јуни падот изнесува 22 отсто.
Според податоците на Народната банка што се однесуваат на вториот квартал од годинава, цената на становите забрзала нагоре за 11,5 отсто. Анализиравме какви се цените на недвижностите по општини.
Колку е преценета пазарната вредност на становите во Македонија?
Показателот на пазарната во однос на фундаменталната вредност на становите во просек за 2023 година укажува дека домашните цени на становите се преценети, и тоа за над 10 проценти, наведуваат од Народната банка во новиот извештај за финансиска стабилност.
Во извештајот се посочува дека становите со просечна пазарна вредност не им се достапни на домаќинствата што располагаат со просечен расположлив доход при тековните пазарни услови. „Со други зборови, становите со просечна пазарна вредност им се достапни на домаќинствата што располагаат со натпросечен доход“, наведуваат од Народната банка.
„Комерцијална банка“ не успеа да ја преземе „Стопанска банка“ АД Битола
„Комерцијална банка“ АД Скопје соопшти дека понудата за преземање на „Стопанска банка“ АД Битола ја прифатиле 149 сопственици на обични акции со право на глас, кои поседуваат вкупно 176.154 обични акции, односно 45,05 проценти од сите акции со право на глас издадени од „Стопанска банка“ АД Битола.
Најмалото количество обични акции што требаше да биде прифатено за да се смета за успешна понудата за преземање беше определено на 261.956 обични акции со право на глас, што претставува 67 проценти плус 1 акција од вкупниот број обични акции со право на глас издадени од битолската банка.
Кина најави стимулативен пакет за заживување на економијата
Кинеската централна банка откри широк пакет мерки за монетарни стимулации за заживување на втората по големина економија во светот. Гувернерот на Народната банка на Кина, Пан Гонгшенг, ја намали краткорочната основна каматна стапка и ги објави плановите за намалување на износот на пари што банките мора да го чуваат во резерва на најниско ниво од 2018 година.
Шефот на централната банка исто така откри пакет за поддршка на проблематичниот сектор за недвижности. Се очекува дека на овој начин Кина ќе успее да се задржи на траекторијата за остварување на годинашната цел - економски раст од пет проценти.
Земјоделците користат роботи со вештачка интелигенција за поздрави посеви
Земјоделците, кои годишно трошат 37 милијарди долари за прскање на полињата со течни хербициди, сè повеќе пробуваат нов модел: користење технологија за помала употреба на хемикалии. Глобалниот земјоделски сектор брзо ги воведува новитетите што ветуваат намалување на употребата на спрејови за контрола на плевел до 90 отсто. Со помош на камери поддржани од вештачка интелигенција (ВИ), новите прскалки можат да ги идентификуваат и да целат на инвазивните растенија, притоа избегнувајќи ги земјоделските култури.
Користењето помалку хербициди преку прецизно нанесување може да помогне во намалување на трошоците за земјоделците, а постојат и еколошки причини за намалување на употребата.
.webp){kind=icon}
