Цената на шеќерот стигна до 14-месечен максимум, расте стравот од недостиг

Фјучерс-договорите за суров шеќер пораснаа на највисоко ниво во повеќе од една година, бидејќи Индија, вториот најголем производител во светот, разгледува намалување на увозните царини за оваа стока, што е најнов знак за ограничувања во глобалната понуда.

Најактивниот договор за суров шеќер поскапе до 4,3 отсто, на 17,59 центи по фунта, што е највисоко ниво од мај 2025 година. Цените во Њујорк пораснаа за повеќе од 18 отсто во август.

Функционери во Индија разгледуваат предлози за намалување или укинување на данокот од 100 отсто на увозните пратки со цел да се зголемат домашните резерви, објави „Блумберг њуз“. Плановите доаѓаат непосредно пред очекуваниот скок на домашната побарувачка во текот на претстојната сезона на празници и фестивали.

 

Во меѓувреме шпекулантите сè повеќе вложуваат во биковски облози на пазарот на шеќер поради загриженоста околу временските услови во клучните производствени региони. Загриженоста дека временскиот феномен Ел Нињо ќе ја намали жетвата во Азија придонесе за зголемувањето на цените на пазарот. Освен тоа, натпросечните дождови во Бразил, водечкиот светски извозник, неодамна ја нарушија преработката на шеќерна трска во таа земја.

Клучната премија што ја имаат фјучерс-договорите за октомври во однос на договорот за март 2027 година исто така порасна, „што сигнализира дека пазарот е подготвен да го вкалкулира ризикот во структурата на кривата“, наведоа во белешка аналитичарите на компанијата „Стоун екс“ (StoneX).