Конечно ја добивме листата на околу 675 производи што се опфатени со владината мерка со која во периодот од 15 декември до 15 јануари ќе се продаваат по цени намалени за најмалку 10 проценти. Таканаречената новогодишна кошничка е договорена во соработка со стопанските комори, синдикатите, производителите, дистрибутерите и трговците, а листата на производи може да се види на веб-страницата mojakosnica.mk.
Премиерот Христијан Мицкоски вчера посочи дека криптовалутите се иднината и токму затоа владата размислува да го регулира тој пазар, иако засега не се знае на кој начин ќе функционира.
К-15, новогодишен бонус или 13-та плата: Што мора, а што може да ви исплати работодавецот
Хроничниот недостиг од работници во земјава ги принуди работодавците да го одврзат ќесето не само кога станува збор за покачување на платите туку и за исплата на различни надоместоци и бонуси. Таквите надоместоци не се регулирани со Законот за работни односи, туку со колективните договори. Некои од нив, како К-15, се обврзувачки за компаниите, другите се добра волја на работодавците.
„Блумберг Адрија“ денеска анализира што мора, а што може да ви исплати вашиот газда пред новогодишните и божиќните празници.
Како да најдете добра работа во Македонија?
Невработените и претставниците на компаниите се сретнаа очи в очи на Саемот за вработување, кој го организира Стопанската комора на Македонија. Целта на организаторите е преку непосреден контакт едните да најдат работа во земјава, другите да ги пополнат празните работни места во своите компании.
На саемот се претставија 25 компании и околу 130 невработени лица. Триесетина од невработените веќе денеска ќе одат на второ интервју во компаниите и се многу поблиску до вработување.
Ем сметките растат ем масите полни: Кој троши во македонските меани?
Кафеанските сметки непрестајно растат. Податоците од Државниот завод за статистика (ДЗС) покажуваат дека во ноември годинава индексот на цени на угостителските услуги се зголемил за шест отсто споредено со истиот месец лани.
Ако се гледа по одделни ставки, позначително е поскапувањето на пијалаците во однос на храната. Поточно, цените на безалкохолните пијалаци на годишно ниво се зголемиле за 5,4 отсто, на алкохолните пијалаци за 5,1 отсто, додека храната поскапела за 1,9 проценти. Анализиравме како и покрај растот на цените, рестораните и натаму се полни, а прометот расте.
Некои од менаџерите ги продадоа акциите од „Македонијатурист“, „Скопски пазар“ стана најголем акционер
Низата мултимилионски блок трансакции со акциите на „Македонијатурист“ во изминативе денови донесоа големи промени во сопственичката структура на компанијата. „Скопски пазар“ купи дополнителни 7.936 акции и поседува 86.166 акции односно 19,05 проценти од вкупниот број обични акции издадени од „Македонијатурист“, со што стана најголем поединечен акционер во компанијата. Ново име меѓу поголемите акционери е „Чезакомерц“, која стана сопственик на 28.102 акции односно 6,21 проценти од вкупниот број обични акции.
Македонија со 6Г: Како ќе изгледа иднината на интернетот?
Мрежата 6Г (6G) претставува следниот голем чекор во телекомуникациите, кој ветува дека ќе го промени начинот на кој се поврзуваме и комуницираме со технологијата. Додека 5Г сè уште се имплементира на глобално ниво, трката за развој на 6Г веќе е во полн ек, со прогнози дека ќе биде достапна од 2030 година.
За разлика од својот претходник, 6Г не е само надградба во поглед на брзината и капацитетот туку трансформативна промена, која вклучува напредни технологии за да овозможи апликации што денес изгледаат како научна фантастика. Експертите со кои разговаравме очекуваат дека вештачката интелигенција ќе биде една од клучните технологии за развој на 6Г-мрежите.
.webp){kind=icon}
