Фед одново ги намали каматните стапки за 25 базични поени, на 4,25 до 4,5 проценти. Ова е трета ваква одлука по ред. Креаторите на монетарната политика во САД најавија дека многу внимателно ќе ја следат инфлацијата и дека во 2025 година темпото ќе забави, па намалување на каматите може да се случи само двапати.
Покрај Фед, работа имаше и за НБРМ. Имено, Народната банка одлучи каматната стапка на благајничките записи да се намали за 0,25 п.п., на нивото од 5,55 проценти. Намалени се и каматните стапки на расположливите депозити, исто така за по 0,25 п.п. „Со ваквата промена на каматните стапки се задржува внимателниот пристап во водењето на монетарната политика, што е условено од натамошното присуство на ризиците поврзани со надворешното опкружување, но и со домашните фактори што влијаат врз агрегатната побарувачка“, велат од НБРМ.
Недела како неработен ден повторно оди на испит
Од вкупно 530 илјади работници што редовно примаат плата, 500.000 веќе три години во недела не работат. Тие што работат, за тоа примаат зголемен надомест за работа во неработен ден затоа што тие влегуваат во дејности за кои регулативата прави исклучок.
Измените во Законот за работни односи со кои недела стана неработен ден стапија во сила на 1 јануари 2022 година. На три години од почетокот на примената на ова решение, се отвора дебатата за измени.
Македонски работници? Барајте ги во Германија
Вкупниот број македонски државјани регистрирани како странци што живеат во Германија заклучно со декември минатата година изнесувал 156.845 лица, што е двојно повеќе отколку пред десет години, кога во оваа земја имало околу 77.000 лица од Македонија, покажуваат податоците на германскиот Федерален завод за статистика.
Ако се земе предвид дека Германија има хроничен недостиг од работници и поради тоа континуирано ги олабавува условите за вработување странски државјани, извесно е дека бројот на македонски граѓани што ќе заминат на работа во оваа земја ќе продолжи да се зголемува. А како ќе се одрази тоа на македонскиот пазар на трудот?
МБИ10 на чекор до историскиот максимум
Македонскиот берзански индекс МБИ10 вчера достигна вредност од 10.012,34 индексни поени и се најде на чекор до историскиот максимум од 10.057,77 индексни поени, кој беше постигнат на 31.8.2007 година, кога Македонската берза ги доживеа своите најдобри денови. МБИ10 годинава порасна за 3.919 индексни поени односно за 64,33 проценти.
Станува збор за одличен резултат, кој во септември годинава го стави МБИ10 меѓу најдобрите пет берзански индекси во светот по остварениот раст од почетокот на годината. Македонската берза годинава бележи добри резултати во однос на повеќе показатели и е на пат да оствари рекорден годишен промет.
Струјата за домаќинствата поскапува за 0,92 отсто
Просечната цена на електричната енергија за домаќинствата од 1 јануари ќе се зголеми за 0,92 проценти. Во првиот блок зголемувањето е за 0,68 проценти, во вториот за 0,9 проценти, во третиот за 1,93 проценти, во четвртиот за 2,24 проценти, a евтината тарифа поскапува за 0,9 проценти, одлучи вчера Регулаторната комисија за енергетика (РКЕ).
Тоа, според пресметките на РКЕ, значи дека едно просечно домаќинство во државата што има сметка од 2.300 денари ќе има зголемен трошок од 21 денар.
Нов рекорд на цената на какаото
Фјучерсите на какаото се искачија над 12.000 долари за тон, достигнувајќи нов рекорд во услови на зголемени грижи поради намаленото производство од најголемиот производител, Брегот на Слоновата Коска.
Договорите се зголемија дури за 3,4 проценти, на 12.163 долари за тон. Фјучерсите годинава речиси тројно се зголемија бидејќи слабите жетви во Западна Африка придонесоа за најдлабок дефицит досега и ги принудија компаниите да ги намалат резервите.
.webp){kind=icon}
