Народна банка ја намали каматата на благајничките записи на 5,55 проценти

Извршниот одбор за поставеноста на монетарната политика на Народната банка на вчерашната седница одлучил каматната стапка на благајничките записи да се намали за 0,25 п.п., на нивото од 5,55 проценти. Од централната банка информираа дека на седницата била донесена одлука за намалување и на каматните стапки на расположливите депозити, исто така за по 0,25 п.п., со што каматните стапки на депозитите преку ноќ и на 7 дена ќе изнесуваат 3,95 и 4 проценти, соодветно. Понудата на благајнички записи на редовната аукција е непроменета и изнесува 10 милијарди денари.

„Со ваквата промена на каматните стапки се задржува внимателниот пристап во водењето на монетарната политика, што е условено од натамошното присуство на ризиците поврзани со надворешното окружување, но и со домашните фактори коишто влијаат врз агрегатната побарувачка“, велат од НБМ.

Од Народната банка и понатаму очекуваат дека нивото на каматните стапки, заедно со досегашните промени кај задолжителната резерва и преземените макропрудентни мерки, ќе придонесат за ценовна стабилност на среден рок и за стабилноста на девизниот курс на денарот во однос на еврото.

„Одлуката за монетарната политика е заснована на оцените за инфлацијата, којашто се движи во рамките на очекувањата, како и на постојаните поволни движења на девизниот пазар“, велат од НБМ.

Очекувано забрзување на инфлацијата

Оттаму додаваат дека годишната стапка на инфлација очекувано забрза во ноември и изнесува 4,3 проценти (3,5 проценти во октомври), заради цените на храната.

„Ова во голем дел се објаснува со пониската споредбена основа од истиот период минатата година, заради мерките преземени тогаш за привремено ограничување на растот на цените. Притоа, базичната инфлација бележи забавување на годишна основа, а има и натамошен пад на цените кај енергетската компонента. Ефектите од споредбената основа кај цените на храната ќе имаат продолжено влијание, односно до крајот на годината се очекува задржување на годишната стапка на инфлација близу до минатомесечното ниво“, велат од НБМ.

Од централната банка посочуваат дека во просек за целата 2024 година се очекува дека инфлацијата ќе изнесува 3,5 проценти, односно во рамките на проектираната стапка, според октомврискиот циклус проекции.

„Во анкетите на ЕК за очекувањата на потрошувачите и натаму преовладуваат очекувања за намалување на цените во следниот период. Во однос на  берзанските цени на примарните производи, според најновите прогнози тие се ревидирани надолу, во согласност со намалената глобална побарувачка“, велат од НБМ.

Оттаму информираат дека состојбата на девизниот пазар е стабилна и движењата се поволни.

„Нивото на девизните резерви на крајот на ноември изнесува 4,92 милијарди евра, што е соодветно за одржување на стабилноста на курсот на домашната валута. Во согласност со поволните движења на девизниот пазар, Народната банка од почетокот на годината интервенира со нето-откуп на девизи, што придонесе и за подобри остварувања кај девизните резерви од очекувањата“, наведуваат од НБМ.

Во однос на последните расположливи податоци од надворешниот сектор, трговскиот дефицит во октомври 2024 година засега е понизок во споредба со очекувањата за четвртиот квартал од октомврискиот циклус проекции.

„Остварувањата на менувачкиот пазар заклучно со крајот на ноември се во согласност со проектираните нето-приливи од приватните трансфери. Остварениот суфицит во тековната сметка на билансот на плаќања во третиот квартал од 2024 година е речиси на нивото од октомвриската проекција, при остварени нето-финансиски одливи во согласност со очекуваните“, информираат од НБМ.

Се следат чекорите на ЕЦБ

Во однос на политиката на Европската централна банка (ЕЦБ), како фактор којшто Народната банка исто така го има предвид, укажуваат дека на последната седница во декември по четврти пат оваа година беше донесена одлука за намалување на каматните стапки за 0,25 п.п.

„Економскиот раст во третиот квартал на 2024 година умерено забрза и достигна три проценти, што е блиску до проекциите на Народната банка. Растот остварен во првите три квартали од годината изнесува 2,6 проценти и е малку повисок од очекуваниот, при нагорни ревизии во податоците за првата половина на годината. Во однос на ризиците за растот во следниот период, тие и натаму постојат и се поврзани пред сѐ со случувањата во надворешното окружување, но и со интензитетот и динамиката на остварувањето на домашните инфраструктурни проекти“, велат од НБМ.

Оттаму порачуваат дека во монетарниот сектор, депозитите и кредитите бележат солидни стапки на раст и движењата засега се подобри од очекувањата за последниот квартал од годината.

„Општо земено, најновите остварувања кај клучните макроекономски показатели, како и согледувањата во однос на нивната идна патека, создадоа простор за натамошно нормализирање на монетарната политика. Ризиците поврзани со надворешното окружување и понатаму постојат, а со внимателност се следат и потенцијалните ризици од домашните фактори коишто би можеле да влијаат на побарувачката и на цените во следниот период“, наведуваат од централната банка.

Во моментов нема коментари за веста. Биди прв да коментира...

Остави коментар