Ветровите ги насочија пожарите кон ултра-луксузни населби во Лос Анџелес

Пожарот Палисејдс се прошири кон североисток, предизвикувајќи нови евакуации во ултра-луксузните населби Брентвуд и Бел Ер во Јужна Калифорнија, додека заканата од суви ветрови одново ги зголеми ризиците по кратката пауза.

Ширењето на пламенот донесе „уште една ноќ на невиден терор и тага“, рече рано во саботата надзорникот на округот Лос Анџелес, Линдзи Хорват.

Проширената зона за евакуација опфаќа некои од најважните културни институции во Лос Анџелес, вклучувајќи го и Центарот Гети, архитектонска знаменитост со светска уметничка колекција. Историскиот културен центар има дизајн отпорен на пожари кој може да биде ставен на тест.

Кетрин Флеминг, претседател и извршен директор на J. Paul Getty Trust, рече дека уметничките галерии се „безбедни и заштитени“, а ситуацијата внимателно се следи.

Кампусот на Универзитетот на Калифорнија во Лос Анџелес е на „висока готовност“ и е советуван да се подготви за евакуација, според Одделот за шумарство и заштита од пожари на Калифорнија. Нови области на Бел Ер источно од автопатот 405 сега исто така се под предупредување за евакуација, напиша советничката Кејти Јарославски во е-пошта до нејзините избирачи.

Пожарот Гети во 2019 година во истата област ги принуди славните личности како ѕвездата на ЛА Лејкерс, Леброн Џејмс и поранешниот гувернер на Калифорнија, Арнолд Шварценегер, да ги напуштат своите домови. Наредбите за евакуација овој викенд го вклучуваат и Енчино.

„Ние сме повредени, ние тагуваме, ние сме лути. И јас сум исто така“, им рече на новинарите во саботата градоначалничката на Лос Анџелес, Карен Бас.

По кратка пауза од ветровите што им даде можност на пожарникарите да направат мал напредок, сувите ветрови ќе го разгорат пламенот и веројатно ќе продолжат во првата половина од следната недела, оставајќи милиони во опасност, според Центарот за предвидување на бури на САД.

Стихијата уби 16 лица до саботата вечер. Единаесет лица загинаа во градот Алтадена, од пожарот Итон, додека петмина загинаа во пожарот Палисејдс. 

Тринаесет лица се исчезнати, соопштија официјалните лица. Уште 19 лица се уапсени во пожарот Итон и дополнителни тројца во Палисејдс за прекршување на полицискиот час, кражба и грабеж. Повеќе од 16.000 луѓе аплицирале за помош од Федералната агенција за управување со вонредни состојби, рече регионалниот администратор Боб Фентон.

Во прогнозите не се очекува дожд, соопштија метеоролозите. Ветровите и сувите услови „ќе ја заджат висока заканата од пожар во округот ЛА“, рече во саботата началникот на пожарникарите на округот, Ентони Мароне. Речиси една недела Лос Анџелес е под терор на огнените јазици додека илјадници домови и други згради се уништени, а повеќе од 180.000 лица мораа да побегнат од ширењето на пожарот. Пожарите Палисејдс и Итон беа толку жестоки што веќе станаа третиот и четвртиот најразорен во историјата на државата, а ниту еден од нив сè уште не е изгаснат.

Сојузни драви вклучувајќи ги Орегон, Вашингтон, Невада, Аризона, Тексас и Монтана придонесоа со ресурси за борба против пожарите во Калифорнија, рече во саботата началникот на пожарникарите, Џо Тајлер.

Гувернерот на Калифорнија, Гавин Њусом, исто така, во саботата објави дека го удвоил бројот на персоналот на Националната гарда кој работи на пожарите на 1.680 одговорни лица. Вкупно, државата распореди повеќе од 14.000 лица за поддршка на напорите за гаснење на огнот.

„Државата работи без престан“, рече во саботата Ненси Ворд, директорка на Канцеларијата за вонредни состојби на гувернерот. Поради тешките временски услови што се очекуваат од понеделник до среда, државата испрати уште повеќе ресурси за борба против пожарите, рече Ворд.

Официјалните лица од Калифорнија го поканија новоизбраниот претседател Доналд Трамп да ги посети областите оштетени од пожарите, но тој не им одговори јавно. Неговиот персонал веднаш не одговори на барањето за коментар. Трамп особено го критикуваше Њусом со неосновани тврдења за водната ситуација во државата, и отиде толку далеку што повика Њусом да поднесе оставка.

Трамп беше познат и во неговиот прв мандат по политизирањето на помошта при катастрофи, барем со неговите коментари. Сепак, во 2018 година, тој издаде голема декларација за катастрофа за пожарот Вулси, кој го опустоши Малибу, забрзувајќи ја федералната помош за областа.

Пожарите, исто така, вршат притисок врз комуналните претпријатија кои превентивно ја прекинаа електричната енергија за жителите. Електроенергетската компанија на Јужна Калифорнија на ЕИ (Edison International) беше повикана од адвокатите кои претставуваат осигурителни компании да зачува докази во врска со пожарот Итон.

Во моментов нема коментари за веста. Биди прв да коментира...

Остави коментар