„Европа треба да заземе конструктивен пристап со администрацијата на Трамп и да се фокусира на зајакнување на силните врски на Европа со САД“, изјави за „Блумберг“ шпанскиот премиер Педро Санчез, кој присуствува на Светскиот економски форум (СЕФ) во Давос. Многубројни пораки од Давос и уште еден плоден ден на СЕФ.
Членот на Управниот совет на Европската централна банка, Клас Кнот, рече дека очекувањата на инвеститорите за намалување на каматните стапки во јануари и март се разумни.
Во Давос се појавува нова поделба во глобалното банкарство. САД веќе ја одложија примената на базелските правила, што би можело да води кон дополнителна дерегулација, додека банкарите во Европа чувствуваат дека се во неповолна позиција. Финансиските раководители исто така имаат различни погледи на политиката на Трамп во врска со криптовалутите.
Во Македонија лани биле увезени 65 возила поскапи од 100.000 евра
Во Македонија лани биле увезени 65 патнички возила вредни над 100.000 евра, информираат од Царинската управа за „Блумберг Адрија“. Тоа е за пет помалку споредено со 2023 година, кога во земјава биле увезени 70 луксузни автомобили што ја надминуваат границата од 100.000 евра.
„Најголем дел возила се увезени од Германија и од Велика Британија, и тоа од брендовите ’Мерцедес’, ’Порше’ и помалку ’Ленд ровер’“, се наведува во одговорот што го добивме од Царинската управа. Анализираме колкави се давачките за увоз и кој купува луксузни возила кај нас.
Уриваме рекорди: Го „подновивме“ возниот парк со 41.000 половни автомобили
Во Македонија лани биле увезени вкупно 59.530 патнички автомобили, од кои 41.483 биле употребувани односно 69,9 проценти, а само 13.168 биле нови. Податоците на Царинската управа покажуваат дека станува збор за најголем број увезени автомобили во текот на една година од 2010 година наваму.
Со ланскиот увоз веќе би требало да има рекордно зголемување на бројот на регистрирани возила во Македонија, чиј број заклучно со 2023 година изнесувал 658.894, а од нив 552.934 биле патнички автомобили.
Две нови авиолинии по барање на дијаспората
Скопје-Женева и Скопје-Париз (аеродром „Орли“) се двете нови авиолинии што се воведуваат од Меѓународниот аеродром во Скопје, соопштија од Министерството за транспорт.
Овие две дестинации, се наведува во соопштението, се воведуваат по барање на дијаспората, а со нив ќе оперира авиокомпанијата „Изиџет“ (easyJet), со тоа што линијата Скопје-Париз ќе започне да функционира од 2 април, додека линијата Скопје-Женева од 3 ноември годинава.
„Реплек“ обезбеди 13 милиони евра за инвестиции
Фармацевтската компанија „Реплек“ АД соопшти дека обезбедила финансиска рамка во износ од 13 милиони евра за спроведување на планираните инвестициски проекти во периодот 2025-2027 година. Оваа стратегија има цел да го поддржи очекуваниот годишен раст од 25 проценти.
Од компанијата додаваат дека преку овие инвестиции ќе ги зајакнат своите напори за проширување на портфолиото на производи, зголемување на пазарното учество и дополнително зацврстување на својата конкурентска позиција на пазарот.
Ќе поскапат ли пакетите на „Нетфликс“?
Компанијата „Нетфликс“ (Netflix) ќе се фокусира на подобрување на својот бизнис во 2025 година со различни пакети за монетизација, се наведува во годишниот извештај. Во него се истакнува и дека ќе има зголемување на цените на претплатата во САД, Канада, Аргентина и Португалија. Овој чекор очигледно е само вовед во поширока стратегија.
Зголемувањето на цените доаѓа по речиси две години релативна ценовна стабилност во повеќето земји, но „Нетфликс“ засега не открива многу од своите планови.
.webp){kind=icon}
